नवलपुर । नवलपुर जिल्लाको गैँडाकोट–२ मा रहेको जिल्लाकै एकमात्र ‘क’ वर्गको गैँडाकोट इङ्लिस स्कुलले एसइई २०८२ मा उत्कृष्ट नतिजा हासिल गर्दै जिल्लामै प्रथम स्थान बनाउन सफल भएको छ। विद्यालयले ९८.३३ प्रतिशत विद्यार्थी उत्तीर्ण गराउँदै उल्लेखनीय सफलता प्राप्त गरेपछि आज विशेष सम्मान कार्यक्रम आयोजना गरिएको हो।

कार्यक्रममा एसइई परीक्षामा उत्कृष्ट प्रदर्शन गर्ने सम्पूर्ण विद्यार्थीहरूलाई सम्मान गरिएको थियो। विशेषगरी ४.०० जिपिए प्राप्त गरेकी छात्रा तेजस्वी पन्तलाई विद्यालयले पूर्वघोषणाअनुसार १ लाख रुपैयाँ बराबरको चेक हस्तान्तरण गरेको छ। विद्यालयले यसअघि नै ४.०० जिपिए ल्याउने विद्यार्थीलाई नगद पुरस्कार प्रदान गर्ने घोषणा गरेको थियो। तेजस्वीले आफ्नो मेहनत, लगनशीलता र आत्मविश्वासका कारण उक्त उपलब्धि हासिल गरेपछि विद्यालयले विशेष सम्मानसहित पुरस्कार प्रदान गरेको जनाएको छ।

सम्मान कार्यक्रममा विद्यालयका प्राचार्य हिरालाल अर्याल, गैँडाकोट नगरपालिकाका नगर शिक्षा अधिकारी खेमप्रसाद आचार्यलगायतले छात्रा पन्तलाई बधाई तथा शुभकामना व्यक्त गर्नुभएको थियो। कार्यक्रममा बोल्दै प्राचार्य अर्यालले विद्यालयले शैक्षिक उपलब्धिसँगै अनुशासन, संस्कार र गुणस्तरीय शिक्षालाई प्राथमिकता दिँदै आएको बताउनुभयो। उहाँले विद्यार्थीको सफलता शिक्षक, अभिभावक र विद्यालयको सामूहिक प्रयासको परिणाम भएको उल्लेख गर्दै आगामी दिनमा अझ उत्कृष्ट शैक्षिक वातावरण निर्माण गर्ने प्रतिबद्धता व्यक्त गर्नुभयो।

त्यसैगरी नगर शिक्षा अधिकारी आचार्यले विद्यार्थीहरू केवल पढाइमा मात्र अब्बल भएर नपुग्ने भन्दै उनीहरू नैतिकवान, जिम्मेवार र अनुशासित नागरिक बन्न आवश्यक रहेको धारणा राख्नुभयो। उहाँले सकारात्मक सोच, असल चरित्र र सामाजिक उत्तरदायित्व बोकेका विद्यार्थी उत्पादन गर्नु नै शिक्षाको मुख्य उद्देश्य भएको बताउनुभयो।

कार्यक्रममा अभिभावक, शिक्षक तथा विद्यार्थीहरूको उल्लेखनीय उपस्थिति रहेको थियो। विद्यालय प्रशासनले आगामी दिनमा पनि गुणस्तरीय शिक्षा र उत्कृष्ट शैक्षिक उपलब्धिलाई निरन्तरता दिने प्रतिबद्धता व्यक्त गरेको छ।

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै

उत्कृष्ट नतिजा दिलाउने अङ्कुरम् एकेडेमीका विषयगत शिक्षक सम्मानित