चितवन । रसुवामा आएको विनाशकारी बाढी तथा पहिरोबाट प्रभावित नागरिकहरूको सहयोगका लागि फोर्ब्स कलेज, भरतपुर–२, क्षेत्रपुर, चितवनले भोलि विशेष रक्तदान कार्यक्रम आयोजना गर्ने भएको छ। मानवीय सहयोग, सामाजिक उत्तरदायित्व र विपद्को समयमा एकताको भावना अभिव्यक्त गर्ने उद्देश्यले कलेजले “For Humanity, For Rasuwa” अभियानअन्तर्गत रक्तदान कार्यक्रम सञ्चालन गर्न लागेको हो।
कलेज परिसरमा २०८३ साल भदौ १६ गते मंगलबार बिहान ७ बजे कार्यक्रम आयोजना हुने कलेजले जनाएको छ। रसुवामा बाढी तथा पहिरोका कारण प्रभावित र घाइते भएका नागरिकहरूको उपचारमा आवश्यक पर्ने रगतको उपलब्धता सहज बनाउन सहयोग पुर्‍याउने उद्देश्यले कार्यक्रम आयोजना गर्न लागिएको हो।

प्राकृतिक विपद्का कारण ठूलो संख्यामा नागरिक प्रभावित हुँदा घाइतेहरूको उपचार तथा जीवनरक्षाका लागि रगतको आवश्यकता बढ्ने गर्दछ। यस्तो अवस्थामा रक्तदानमार्फत मानवीय सहयोग पुर्‍याउन सकिने भएकाले कलेजले यस कार्यक्रमलाई सामाजिक सेवाको महत्वपूर्ण पहलका रूपमा अघि बढाएको जनाएको छ।

“Your single act of kindness can be someone’s second chance at life” भन्ने सन्देशसहित आयोजना हुन लागेको रक्तदान कार्यक्रममा कलेजका विद्यार्थी, शिक्षक, कर्मचारी, अभिभावक, पूर्वविद्यार्थी तथा रक्तदान गर्न योग्य सम्पूर्ण शुभेच्छुकहरूलाई सहभागी हुन आह्वान गरिएको छ। कलेजले रक्तदानका लागि इच्छुक सबैलाई समयमै उपस्थित भई अभियानलाई सफल बनाउन आग्रह गरेको छ।

फोर्ब्स कलेजले सामाजिक उत्तरदायित्वअन्तर्गत विभिन्न मानवीय, सामाजिक तथा जनचेतनामूलक गतिविधिमा सक्रिय सहभागिता जनाउँदै आएको बताएको छ। विपद्को समयमा प्रभावित समुदायलाई सहयोग गर्नु समाजप्रतिको साझा दायित्व भएको उल्लेख गर्दै कलेजले यस कार्यक्रमलाई सहयोग, सद्भाव र एकताको अभियानका रूपमा अघि बढाउन लागेको जनाएको छ।

रसुवामा बाढी तथा पहिरोबाट प्रभावित नागरिकहरूलाई प्रत्यक्ष तथा अप्रत्यक्ष रूपमा सहयोग पुर्‍याउने उद्देश्यले आयोजना हुन लागेको रक्तदान कार्यक्रमले विपद्का समयमा समुदायबीचको सहकार्य र मानवीय भावनालाई थप मजबुत बनाउने अपेक्षा गरिएको छ।

“रक्तदान गरौँ, जीवन बचाऔँ; रसुवाका पीडितसँग एकजुट बनौँ र आशा जगाऔँ” भन्ने सन्देशका साथ फोर्ब्स कलेजले सम्पूर्ण चितवनवासीलाई कार्यक्रममा सहभागी भई मानवीय सेवामा योगदान पुर्‍याउन आग्रह गरेको छ। कलेजका अनुसार एक व्यक्तिले गरेको रक्तदानले आवश्यकतामा रहेका व्यक्तिको जीवन बचाउन महत्वपूर्ण योगदान पुर्‍याउन सक्छ। त्यसैले योग्य नागरिकहरूलाई रक्तदान गरी विपद्पीडितप्रति ऐक्यबद्धता जनाउन कलेजले अपिल गरेको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै