☰

भर्खरै

लोकप्रिय समाचार

पुलको ग्याबिन वगाउँदा स्थानियलाई दुःख

  •   शुक्रबार, भदौ १८, २०७८ मा प्रकाशित
    • अ
    • अ
    • अ

    चितवन । कालिका नगरपालिकामा पर्ने कयर खोलाको पुल र सडक जोड्ने ग्याबिन वगाए पछि स्थानियले दुःख पाएका छन् । पुल सम्पन्न हुनै लाग्दा त्यसकै साहारामा आवतजावत गर्दै आएका उनीहरुले ग्याविन वगाए संगै दुःख पाएका हुन । वर्षातको समय होस वा अन्य समय सडक सञ्जाल जोड्ने पुलको ग्याबिन खोलाले वगाए पछि त्यहाँका स्थानिय सदरमुकाम आउनलाई समेत खोला तर्नु पर्ने बाध्यता रहेको छ । तीन दोभानबाट उर्लिदै आएको कयर खोलाले गत असार १७ गते पुलको ग्याबिन भत्काएको हो ।

    स्थानिय कालिका नगरपालिका वडा नम्बर १० का बम वहादुर चेपाङले पुलको ग्याविनको मर्मत नहुँदा दुःख पाएको गुनासो गर्नुभयो । उहाँले भन्नुभयो “पुल मर्मत नहुँदा गाउँमा कोही पनि विरामी नपरेहुन्थ्यो भन्ने लाग्छ । त्यतिमात्रै होइन शहरमा जानुपर्ने काम नै नपरे हुन्थ्यो भन्ने हुन्छ । तर के गर्ने जानै प¥यो ।” विरामी भए वा बजारमा काम परेर जानुपरे ज्यानै जोखिममा राखेर जानु पर्ने बाध्यता रहेको उहाँको भनाई छ । ग्याविन भत्कीदाँ गाउँमा यातायात सम्पर्क बिच्छेद वनेको छ ।

    भत्किएको ग्याबिन आज सम्म पनि मर्मत नहुँदा सहज आवतजावत गराउन स्थानिय तहले खासै चासो नदिएको उनीहरुले आरोप लगाएका छन् । कालिका नगरपालिका वडा नम्बर ११ का दिनेश प्रजा ग्याबिन मर्मत नहुँदा खोला तर्ने क्रममा ज्यानै जाने हो कि भन्ने डर लाग्ने गरेको बताउनुहुन्छ । उहाँले भन्नुभयो “ग्याविन मर्मतका लागि कसैले चासो दिएका छैनन् ।” साबिक सिद्धि गाउँबिकास समितिका अध्यक्ष कृष्ण वहादुर प्रजाले स्थानिय सरकारले यहाँका जनताको पिडा बुझ्न नसकेको आरोप लगाउनुभयो ।

    उहाँले भन्नुभयो “वाढिले बगाएको भागमा जतिसक्दो चाँडो मर्मत गरिनु पर्छ । यहाँका जनताको माग सुनुवाई हुनु पर्छ ।” वि. सं. २०६९ सालको साउनमा तत्कालिन प्रधानमन्त्री डा. बाबुराम भट्टराई सिद्धी जान आउँदा वाढिका कारण ट्याक्टरबाट तर्नु परेको थियो । सो बाध्यता पछि निर्माण गरिएको पुलको ग्याबिन भत्किदा समस्या भएको चेपाङ समुदायका अभियान्ता केपी किरण शर्माले बताउनुभयो । उहाँले भन्नुभयो “पुलमा जाने वाटोनै वगायो अब कसरी आवतजावत गर्ने ।”

    डाइनामिक कन्स्ट्रक्सन प्रालि भरतपुरले निर्माणको जिम्मा लिएको पक्की पुल ३५ मिटर लम्वाई र ८ दशमलव ४ मिटर चौडाईको छ । रु ३ करोड ७० लाख २५ हजारको लागतमा बन्दै गरेको पुल निर्माणको काम अन्तिम चरणमा छ । वि. सं. २०७७ असार ३० गते सम्झौता भई वि. सं. २०७८ साल पौष २९ गते सक्ने लक्ष्य रहेको छ । पुल निर्माणको काम ९० प्रतिशत सम्पन्न भई सकेको समयमा खोलाले पुल संग जोड्ने ग्याविन वगाएको हो ।

    कालिका नगरपालिकाका प्रमुख खुमनारायण श्रेष्ठका अनुसार ठेकेदार कम्पिनिले बिमाको क्षेती दावीका लागि समय लागेकाले निर्माणको काम रोकिएको बताउनुभयो । बिमा कम्पनीले स्थलगत अनुगमन गरिसकेकाले अब केही दिनमानै निर्माणका काम सुरु हुने उहाँको भनाई छ । पुल नबन्दा सास्ति पाएका स्थानियले पुल बनेर हिड्न मिल्ने हुँदा समेत जोखिम मोल्नुपर्ने बाध्यता छ । यसबाट कालिका नगरपालिका वडा नम्बर १० र ११ का बासिन्दा प्रभावित भएका छन् । रासस

    लोकप्रिय

    भर्खरै