चितवन । कालिका नगरपालिका ७ मा गठबन्धनको तर्फबाट वडाध्यक्षका उम्मेदवार कमल मुक्तान घरदैलोमा व्यस्त छन् । नेपाली कांग्रेसबाट वडाध्यक्षमा उठेका मुक्तान वडाबासी माझ लोकप्रिय छन् । युवा उम्मेदवार मुक्तानले वडाध्यक्षमा विजयी भए वडा भित्रका विपन्न वर्गका लागि नि:शुल्क एम्बुलेन्सको व्यवस्था गर्ने प्रतिवद्धता जनाएका छन् ।

कालिका ७ मा धेरै पिछडिएको वर्गको बसोबास रहेकोले उनीहरुका लागि नि:शुल्क एम्बुलेन्सको व्यवस्थालाई आफुले प्राथमिकतामा राखेको उनले बताएका हुन् । ‘यहाँ धेरै विपन्न वर्गको बसोबास छ । उहाँहरुले अस्पतालसम्म जानका लागि एम्बुलेन्स भाडा तिर्न समेत नसक्ने अवस्था छ, उनले भने, ‘त्यस्ता पिछाडिएका र विपन्न वर्गका लागि अस्पतालसम्म जान नि:शुल्क एम्बुलेन्स उपलब्ध गराउने प्रतिवद्धता जनाउन चाहन्छु ।’ यस्तै उनले वृद्धवृद्धाहरुका लागि घर-घरमै वृद्धभत्ता पुराउने व्यवस्था गरिने प्रतिवद्धता जनाएका छन् ।

उनले आफु विजयी भए वृद्धभत्ताका लागि बैंकमा गएर लाइन बस्नुपर्ने बाध्यताको अन्त्य गर्ने बताएका हुन्। बैंकसँग समन्वय गरेर वडा कार्यालय मार्फत नै घर-घरमा वृद्धभत्ता पुराउने व्यवस्था गरिने उनको प्रतिवद्धता छ । मुक्तानले युवाहरुका लागि सिपमुलक तालिम ल्याउने बताएका छन् । बिरोजगारी अन्त्यका लागि सिपमुल्क तालिम सञ्चालन गरेर युवाहरुलाई स्वरोजगार बनाउने उनको योजना छ । कृषिमा लाग्न चाहनेहरुलाई फार्म दर्ता गराई बिभिन्न अनुदान तथा बिना धितो ॠण उपलब्ध गराउन प्रयास गर्ने समेत उनले बताए ।

कालिका ७ मा भूमिहिन सुकुम्बासीहरुको बसोबास रहेको छ । त्यस्ता भूमिहिन सुकुम्बासीहरुलाई लालपूर्जा वितरणका लागि नगरपालिकासँग समन्वय गरेर पहलकदमी गरिने उनले बताए । यस्तै वडा भित्रका बस स्टेसनहरुमा सार्वजनिक शौचालय निर्माण गर्ने पनि उनले प्रतिवद्धता जनाएका छन् । उनले वडा भित्र अनिवार्य रुपमा स्वास्थ्य बीमा लागू गर्ने बताए तथा अती विपन्न तथा विपन्न परिवारलाई निशुल्क स्वास्थ्य बीमाको व्यवस्था गर्ने पनि उनले बताए ।

सिचाँईको उचित व्यवस्थापन, डुबान नहुने गरी निकास, कच्ची सडकमा कालोपत्रे, बाटोको स्तरोन्नती, सबै वडाबासीमा शिक्षा, स्वास्थ्यको पहुँच, कृषिलगायतलाई आफुले प्राथमिकतामा राखेको उनले बताए । उनले जनताको सेवकको रुपमा सेवा गर्नका लागि आफु चुनावी मैदानमा उत्रिएको भन्दै अहिलेका प्रतिवद्धता पुरा गर्ने बताए । मतदाताहरु पनि सत्ता गठबन्धन दलहरु प्रति सकारात्मक रहेका छन् । पालिकासँगै कालिका ७ मा गठबन्धनको जित हुने वडाध्यक्ष पदका उम्मेदवार मुक्तानले विश्वास व्यक्त गरे ।

‘मतदाताहरु सकारात्मक हुनुहुन्छ । गठबन्धनले जित्नेमा विश्वस्त छु ।’ उनले आफुहरुले मतदाताको मन जितिरहेको दाबी गरे । उनले गठबन्धनका उम्मेदवारहरु अत्याधिक मतका साथ विजयी गराउन वडाबासीलाई आग्रह समेत गरे । कालिकामा सत्ता गठबन्धनले मेयरमा कांग्रेसका शिवराम केसीलाई उठाएको छ । यस्तै उपमेयरमा नेकपा माओवादी केन्द्रबाट सबिता लामा उम्मेदवार छिन् ।

वडा नम्बर ७ को अध्यक्षमा कांग्रेसबाट कमलराज मुक्तान, महिला सदस्यमा नेकपा एकीकृत समाजवादीकी फुलमाया कुमाल, दलित महिला सदस्यमा माओवादी केन्द्रकी बिष्णुमाया परियार तथा खुला सदस्यमा कांग्रेसका पुस्कल बस्नेत र माओवादी केन्द्रका खड्कबहादुर विक रहेका छन् ।

नेपाली कांग्रेस चितवन क्षेत्र नं. २(क) मा नवनिर्वाचित पदाधिकारीलाई पद हस्तान्तरण

बीपी कोइराला मेमोरियल क्यान्सर अस्पतालमा चिकित्सकको माग

प्रधानमन्त्री राहत कोषमा मौज्दात १८ अर्ब ३७ करोड नाघ्यो