देउखुरी । नेपाल पत्रकार महासङ्घका केन्द्रीय अध्यक्ष विपुल पोखरेलले प्रेस राज्यको नजरमा पर्न नसकेको बताउनुभएको छ । नेपाल पत्रकार महासङ्घ दाङ शाखाको आयोजनामा ‘प्रेस काउन्सिलका सदस्य र न्यूनतम पारिश्रमिक निर्धारण समिति संयोजकसँग सञ्चार माध्यममा आचारसंहिता पालना’ विषयक छलफल भएको हो । कार्यक्रममा अध्यक्ष पोखरेलले संसद् र सरकारको प्राथमिकतामा मिडिया पर्न नसक्दा लामो समयदेखि बनेका ऐन, कानून सही ढङ्गले कार्यान्वयन हुन नसकेको बताउनुभयो ।

उहाँले मिडियाका एजेण्डा सरकार र संसद्को प्राथमिकतामा पार्न पछिल्लो समय पत्रकार महासङ्घले निरन्तर पैरवी गर्दै आएको बताउनुभयो । न्यूनतम पारिश्रमिक निर्धारण समितिका अध्यक्ष सङ्गीता खड्काले मिडियाको सबलीकरणमा दाङले खेलेको भूमिका अहम रहेको उल्लेख गर्दै कामका लागि अवसर पनि पाएको बताउनुभयो । प्रेस काउन्सिल सदस्य दीपक पाण्डेले समस्या ऐन नियममा रहेको औँल्याउँदै गलत र कमजोर मानसिकताले काम गर्दा सञ्चार क्षेत्रमा असर देखापर्ने गरेको बताउनुभयो ।

प्रेस स्वतन्त्रता सेनानी सुशील गौतमले मिडिया क्षेत्र भय र लोभबाट मुक्त नहुँदासम्म नैतिक स्खलन भइरहने र यसले सिङ्गो सञ्चार क्षेत्र कमजोर बन्ने खतरा रहेको बताउनुभयो । कार्यक्रममा महासङ्घ दाङ शाखा पूर्वअध्यक्ष तथा नयाँ युगबोध दैनिकका प्रबन्ध निर्देशक प्रताप रेग्मी, रेडियो मध्यपश्चिम सञ्चालक समिति अध्यक्ष मधुसूदन वैद्य, महासङ्घका पूर्वअध्यक्षहरु केबी मसाल, केएल पीडित, सुदीप गौतम, सविन प्रियासन, मेचीकाली अनलाइनका सम्पादक टीका बस्नेतले पत्रकारिता र मिडिया क्षेत्रको संवर्द्धन र प्रवर्द्धनका लागि राज्य उदार हुन आवश्यक रहेकोमा जोड दिनुभयो ।

लुम्बिनी लायन्सको तेस्रो जित, जनकपुर बोल्ट्स १६ रनले पराजित

बिहीबारदेखि देशका विभिन्न क्षेत्रमा वर्षा हुने

विदेशी फूलको आयात रोक्न किसानको माग