☰

भर्खरै

लोकप्रिय समाचार

पुङ्गी खोला संरक्षण भरतपुर महानगर

  •   बुधबार, असार ०६, २०८० मा प्रकाशित
    • अ
    • अ
    • अ

    चितवन । भरतपुर महानगरपालिका हुँदै बग्ने पुङ्गीखोला संरक्षणका लागि महानगरपालिकाले काम सुरु गरेको छ । वडा नं ११, २, ३ र ४ हुँदै बग्ने सो खोला संरक्षणका लागि महानगरपालिको पुङ्गीखोला सिमाङ्कन तथा संरक्षण समिति बनाएर काम सुरु गरेको हो । विसं २०२१ को नापी सर्वेभन्दा पहिलादेखि रहेको सो खोला अतिक्रमणमा परेसँगै महानगरले संरक्षणका लागि काम सुरु गरेको हो । भरतपुर महानगरपालिका–३ का वडाध्यक्ष अध्यक्ष विकास थापाको संयोजकत्वमा समिति गठन गरेर कामलाई अघि बढाइएको हो ।

    समितिका सदस्य सचिव विकास देवकोटाका अनुसार पुङ्गीखोला संरक्षणका लागि अहिले सिमाङ्कनको काम सुरु गरिएको छ । भरतपुर महानगरपालिका वडा नम्बर ३ र ४ मा सिमाङ्कनको काम सम्पन्न भई सकेको छ । अहिले वडा नम्बर २ को सिमाङ्कनको काम सुरु गरिएको उहाँले जानकारी दिनुभयो । उहाँले भन्नुभयो “दुई खोलाको सिमानाभित्र वडामा २० भौतिक संरचना बनेको पाइएको छ ।”

    सिमाङ्कनका क्रममा कतिपय स्थानमा नक्शामासमेत नभेटिएको उहाँले जानकारी दिनुभयो । समितिका संयोजक वडाध्यक्ष थापाले सिमाङ्कनको काम सकिएपछि गुरुयोजना अनुसार काम अघि बढाइने छ । भरतपुर महानगरपालिकाले दुई वर्षअघि तयार पारेको गुरुयोजना अनुसार काम सुरु गरिएको हो । नक्शाङ्कनको काम सकिएसँगै गुरुयोजनालाई परिमार्जन गरी कामलाई अघि बढाइने उहाँले बताउनुभयो । भरतपुर महानगरपालिका–११ गणेशधामबाट सुरु हुने सो खोला ७ किलोमिटर तल भरतपुर महानगरपालिका वडा नं ४ रामघाटमा नारायणी नदीमा गएर मिसिएको छ ।

    खोलाको रेखाङ्कनको काम असार महिनाभित्र सम्पन्न गर्ने गरी अघि बढाइएको महानगरपालिकाले जनाएको छ । गुरुयोजना अनुसार महानगरले पुङ्गी खोलालाई पर्यटकीयस्थलको रुपमा विकास गर्ने योजना रहेको छ । तीन स्थानमा पार्क निर्माण, खोला किनारमा हरियाली, पैदल मार्ग, साइकल मार्ग लगायतका संरचना निर्माण गर्ने गरी गुरुयोजना तयार गरिएको थापाले बताउनुभयो । हाल अतिक्रमणमा परेको खोला कतै साँधुरो र नालीको रुपमा प्रयोग हुँदै आएको देखिन्छ ।

    खोलालाई पहिलेको जस्तै स्वच्छ राख्नका लागि खोलामा मिसाइएका ढलको व्यवस्थापनसमेत गुरुयोजनामा राखिएको छ । भौतिक संरचना हटाइ यसलाई पुरानै अवस्थामा फर्काउने गरी काम गर्न लागिएको वडाध्यक्ष थापाले बताउनुभयो । उहाँले भन्नुभयो, “प्रमुख बजार क्षेत्र हुँदै बग्ने यो खोलाको अतिक्रमण हटाएर सुन्दर रुप दिन्छौंँ ।” कानुनसम्मत काम अघि बढाइएको भन्दै उहाँले अतिक्रमित संरचना हटाउन समय दिने जानकारी दिनुभयो । उहाँले थप्नुभयो “समयमा संरचना नहटाए हामी आफैले हटाउँछौँ ।”

    लोकप्रिय

    भर्खरै