चितवन  ।  नेपाल कम्युनिष्ट पार्टीका स्थायी कमिटी सदस्य सुरेन्द्र पाण्डेले अर्थ मन्त्रालयबाहेक अरू जिम्मेवारीमा आफू सरकारमा नजाने स्पष्ट पारेका छन्। पाण्डेले आफूलाई अहिलेसम्म मन्त्री बन्न कुनै प्रस्ताव नआएको समेत बताए। स्रोतका अनुसार पाण्डेलाई सहरी विकास मन्त्री बन्न प्रधानमन्त्रीका परराष्ट्र सल्लहाकार राजन भट्टराईले फोन गरेका थिए। अहिले तीन मन्त्रालय खाली छन्।अर्थ र सञ्चार मन्त्रालयको जिम्मेवारी प्रधानमन्त्री ओली आफैंले लिएका छन् । सहरी विकास मन्त्रालयको जिम्मेवारी भौतिक मन्त्री वसन्त नेम्वाङलाई दिइएको छ।’उहाँ(सुरेन्द्र पाण्डे)केही दिनअघि चितवनको एउटा कार्यक्रममा आउनुभएको थियो। त्यो बेलामा बालुवाटारबाट फोन आयो। कार्यक्रममा भएको बेलामा उहाँले लाउडस्पिकरमा राखेर कुरा गर्नुभएको थियो,’ स्रोतले भन्यो,’मञ्च वरपर रहेका सबैले उहाँलाई आएको प्रस्ताव र उहाँले अस्वीकार गरेको प्रत्यक्ष सुन्नुभएको थियो। मैले पनि त्यही बेला सुनेको हो।’ पाण्डेले भने आफूलाई प्रस्ताव आएको र मन्त्री बन्न लागेको भनेर समेत गलत हल्ला फिजाइएको दाबी गरे। ‘मैले अर्थको जिम्मेवारी हुँदा जान्छु, नभए जान्नँ भनेर पहिला नै भनिसकेको छु। मलाई त्यस्तो प्रस्ताव केही आएकै छैन,’ पाण्डेले भने, ‘म अरू मन्त्रालयमा जादिनँ। अरू मन्त्री बन्न पर्‍यो भनेर प्रस्ताव पनि आएको छैन।’ यसअघि पाण्डे २०६६ सालमा माधव नेपाल नेतृत्वको सरकारमा २० महिना अर्थ मन्त्री बनेका थिए। प्रधानमन्त्रीका परराष्ट्र सल्लाहकार राजन भट्टराईले पनि आफूले फोन गरेको भनेर अनावश्यक हल्ला फैलाइएको दाबी गरे। ‘यो हल्लामात्रै हो। नेताहरूसँग विभिन्न समयमा विभिन्न खालका कुराकानी हुन्छन्,’ उनले भने,’कुन सन्दर्भमा कहिले टेलिफोनमा के कुराकानी भयो। भेटघाटमा के कुराकानी हुन्छ। ती सबै समाचार बनाउन थाल्ने हो भने केही पनि रहँदैन।’