महाधिवेशनको प्रचारप्रसारका लागि मंगलबार भरतपुर र नारायणगढमा मोटरसाइकल र्‍याली निकालिएको छ । युवा संघ नेपाल चितवनको आयोजनामा गरिएको र्‍यालीमा दुई हजार बढी मोटरसाइकल सहभागी भएका आयोजकले जनाएको छ ।

जिल्लाको विभिन्न पालिकाबाट मोटरसाइकलसहित आएका युवाहरू एमालेको महाधिवेशन उद्घाटनस्थल नारायणी नदी किनारमा जम्मा भएर र्‍यालीमा सहभागी भएका हुन् । नारायणी नदी किनारबाट सुरु भएको मोटरसाइकल र्‍यालीले भरतपुर महानगरपालिकाको विभिन्न भाग परिक्रमा गरेको हो ।

एमाले महाधिवेशने प्रचार प्रसारको गीत बजाउँदै नारायणी नदी किनारबाट सुरु भएको र्‍याली नारायणगढको मेनरोड, पोखरा बसपार्क, आँपटारी, बाइपास सडक हुँदै केन्द्रीय बस टर्मिनल, चौबीसकोठी, लायन्सचोक, शहीदचोक, पुलचोक हुँदै महाधिवेशन उद्घाटन स्थल नारायणी नदी किनारमा आएर समापन भएको थियो ।

युवा संघ नेपाल चितवनका संयोजक सुशील केसीले आगामी १० गते नारायणगढको नारायणी नदी किनारमा हुने एमाले महाधिवेशनको उद्घाटनमा व्यापक जनसहभागिता जुटाउने उद्देश्यले मोटरसाइकल र्‍यालीको आयोजना गरिएको बताए । भरतपुरसँग जिल्लाका अन्य पालिकाहरूमा समेत महाधिवेशनको प्रचार गर्दै मोटरसाइकल र्‍याली निकालिएको उनले बताए ।

नेकपा एमालेको केन्द्रीय निर्देशन अनुसार मंगलबार नवलपुर, मकवानपुर सहित देशका मुख्य सहरहरूमा युवा संघले मोटरसाइकल र्‍याली निकालेको थियो ।