चितवन । नेपाली कांग्रेस चितवन सभापतिका उम्मेदवार राजेश्वर खनालले सेवामुलक राजनीतिका लागि आफुले उम्मेदवारी दिएको बताएका छन् । बिहीबार भरतपुरमा पत्रकार सम्मेलन आयोजना गर्दै उनले पेशा नभई सेवामुलक राजनीति स्थापित गर्नका लागि आफुले जिल्ला सभापतिमा उम्मेदवारी दिएको बताएका हुन् ।

राजनीति सेवामुलक हुनुपर्छ भन्ने आफ्नो मान्यता रहेको उनको भनाइ थियो । ‘पार्टी सेवा हो, पेशा होइन भन्ने मान्यता स्थापित हुनुपर्छ, उनले भने, ‘राजनिती गर्नेले म को हुँ ? कहाँबाट आए ? मेरो उद्धेश्य के हो ? कर्तव्य के हो ? म कत्तिको उत्तरदायी छु ? सबै प्रश्नको उत्तर दिन सकिने चित्र हुनुपर्छ ।’ उनले आफु सभापतिमा निर्वाचित भए चार वर्ष अन्य कुनै पदमा लालायित नभई संगठन विस्तार र पार्टीलाई बलियो बनाउन केन्द्रित हुने प्रतिवद्धता जनाए । ‘राइट म्यान राइट प्लेस’ आफ्नो मुख्य योजना रहेको उनको भनाइ थियो ।

उनले अहिले काँग्रेसको भातृ संगठनको अवस्था लथालिङ्ग रहेको भन्दै आफु सभापतिमा निर्वाचित भए सबैलाई व्यवस्थित गरेर अघि बढ्ने बताए । कसैलाई समस्या परे आवश्यक सहयोग र समन्वय गर्न आफु सधैं तयार हुने उनको भनाइ थियो । यस्तैले उनले बैशाखमा हुने स्थानीय तहको निर्वाचनमा कांग्रेसलाई जिल्लाका सबै पालिकामा जिताउन सहयोगी भूमिका खेल्ने समेत उनले बताए । उनले आगामी निर्वाचनमा काँग्रेसलाई एक्लै लड्न सक्ने पार्टी बनाउने प्रतिवद्धता समेत व्यक्त गरे ।

२०४३ सालमा नेपाल विद्यार्थी संघ चन्द्रावती मावि तनहुँबाटबाट विद्यार्थी राजनीति हुँदै राजनीतिक यात्रा सुरु गरेका खनाल हाल काँग्रेस महासमिति सदस्य हुन् । काँग्रेसको जिल्ला अधिवेशन आजबाट नारायणगढ स्थित नारायणी कला मन्दिरमा सुरु भएको छ । आज पहिलो दिन मनोनयन भएको छ ।

जिल्ला सभापति पदका लागि पाँच जनाले मनोनयन दर्ता गराएका छन् । मतदान प्रक्रिया शुक्रबार बिहान ९ बजेबाट सुरु हुनेछ ।

तिहारमा आम्दानी गर्ने सपना वर्षाले चुँडायो, चितवनमा ७० प्रतिशतसम्म सयपत्री फूल नष्ट

चितवनमा प्रतिबन्धित माउर माछापालन नष्ट गर्न प्रशासनको निर्देशन

चितवनमा ६ लाखभन्दा बढी मूल्यका पटाका बरामद, दुई जना पक्राउ