उद्योग वाणिज्य संघ चितवनको ५५ औँ वार्षिक साधारण सभा सम्पन्न

हल्कारो समाचार

शनिबार, फागुन २८, २०७८ मा प्रकाशित

चितवन । नेपाल उद्योग वाणिज्य महासंघका केन्द्रीय उपाध्यक्ष चन्द्र ढकालले रुस र युक्रेनको युद्धले नेपाललाई समेत असर पर्न सक्ने बताएका छन् । उनले नेपालको आर्थिक र खाद्यन्न क्षेत्रमा समस्या आउन सक्ने बताउँदै सवै एकजुट भई अहिलेको संकट पार गर्नुपर्नेमा जोड दिए । देशमा दोषारोपण गरेर अर्थतन्त्र नसुधारिने बताउँदै कोभिड र विश्वका युद्धले अझ नराम्रो अवस्था आउन सक्ने आकलन गरेका हुन् ।

निजी क्षेत्रले सरकारलाई र सरकारले निजी क्षेत्रलाई दोष लगाउँदैमा अहिलेको समस्या समाधान नहुने उनको भनाई थियो । उद्योग वाणिज्य संघ चितवनको ५५ औँ साधारण सभा एवम् अधिवेशनको उद्घाटन गर्दै उहाँले कोभिडका कारण शिथिल भएको अर्थतन्त्र केही चलायमान हुन खोजेपनि पुनः विश्वमा भइरहेको युद्द र द्वन्द्वले थप समस्या थपेको बताए ।

साथै चितवनलाई कृषि र पर्यटनको हव गराउन महासंघको तर्फबाट हुन सक्ने सहयोगका लागि आफू तयार रहेको ढकालले बताए । साधारण सभाको अवसरमा उद्योग वाणिज्य संघले यस वर्षको आर्थिक पत्रकारिता पुरस्कार पत्रकार विप्लव काफ्लेलाई प्रदान गरेको छ । रु. ५१ हजार राशिको पुरस्कार काफ्लेलाई आज हस्तान्तरण गरिएको हो ।

त्यस्तै रु. १ लाख राशिको उत्कृष्ट युवा उद्यमी पुरस्कार कृष्ण सापकोटालाई प्रदान गरिएको छ । संघको अधिवेशनतर्फ अध्यक्षमा चुननारायण श्रेष्ठ,बरिष्ठ उपाध्यक्षमा सुमन कुमार श्रेष्ठ,उपाध्यक्ष उद्योगतर्फ चिरञ्जीवी सुवेदी सहित अन्य पदमा पनि सर्वसम्मत चयन भइसक्नु भएको छ । सहमति हुन नसकेका पदमा फागुन ३० गते निर्वाचन हुने उद्योग वाणिज्य संघ चितवनले जानकारी दिएको छ ।