चितवन  । हातमा सीप भएपछि स्वदेशमा नै राम्रो आम्दानी गर्न सकिन्छ भन्ने उदाहरण बन्नुभएको छ भरतपुर–२७ वनकट्टाका दीपक चौधरी । उहाँले तयारी पोसाक उद्योग सञ्चालन गरेर ४० जनालाई रोजगारी दिँदै आइरहनुभएको छ । साथीभाइ विदेश जाने लहर चलिरहेका बेला उहाँले भरतपुर २ क्षेत्रपुरमा ओम साइराम नेपाली तयारी पोसाक उद्योग सञ्चालन गर्नुभयो ।

“उद्योगमा सट, पाइन्ट, टिसर्ट, जिन्सको पाइन्ट बनाइने गरिएको छ । पहिला उद्योगमा पाँच छ प्रकारका कपडा बनाउने गर्दथे”, उहाँले भन्नुभयो, “अहिले २५ देखि ३० प्रकारका कपडा बनाउने गरेको छु । उद्योगमा बनाएको कपडा हेटौँडा, धनगढी, नेपालगञ्ज, सुर्खेत, दाङ, बुटवल, भैरहवालगायतका सहरमा बिक्री गर्ने गरिएको छ ।”

सानैदेखि कुनै पनि काममा आफै नेतृत्वदायी भूमिका खेल्न रुचाउने उहाँले ३७ वर्षको उमेरमा उद्योग खोल्नुभयो । साथीभाइसँग मिलेर उद्योग सञ्चालन गर्नुभएका चौधरी उद्योगको पनि निर्देशक हुनुहुन्छ । उहाँले भन्नुभयो, “साथीभाइ सबै विदेश गए, मैले नेपालमा केही नयाँ गर्छु भन्ने सोच लिएर अगाडि बढेँ ।”

आफ्नो मेहनत र परिश्रमले दिनप्रतिदिन सफलताको सिढी चढेको उहाँको अनुभव छ । विसं २०७२ कात्तिक २ गते स्थापना भएको उद्योगबाट सुरुवाती चरणमा सबै खर्च कटाएर एक लाख पचास हजार रुपैयाँ बचत हुन्थ्यो । अहिले सबै खर्च कटाएर तीन लाख रुपैयाँसम्म बचत हुने गरेको उहाँ बताउनुहुन्छ ।

कक्षा ८ मा पढ्दापढ्दै उहाँले घरको आम्दानीको स्रोत केही नभएपछि भारत गएर गार्मेन्टको काम गर्न थाल्नुभयो । भारतमा ६ वर्षसम्म काम गरेपछि काठमाडौँ आएर उहाँले चार वर्ष काम गर्नुभयो । ‘१० वर्ष सिकेको सीप आफ्नै ठाउँमा आएर प्रयोग गर्दा सफलता मिल्दै गयो, उहाँले भन्नुभयो ।’ “४० लाखबाट सुरु गरेको उहाँको उद्योगमा अहिले डेढ करोड लगानी भइसकेको छ ।” भारतमा काम गर्दादेखि नै नेपालमा गएर केही काम गर्छु भन्ने सोच बनाएको उहाँ बताउनुहुन्छ । अहिले उहाँको दैनिकी उद्योग व्यवस्थापन र सञ्चालनमा बित्ने गरेको छ ।

उहाँले उद्योग खोल्दा धेरै चुनौतीको सामना गर्नुपरेको उहाँ बताउनुहुन्छ । ‘उद्योग सञ्चालन गरिराख्दा धेरै चुनौती आए । कहिलेकाहीँ त पेसा छाडौँ कि जस्तो पनि भयो तर निरन्तरको कामले सफलता मिल्दै गयो’,उहाँले भन्नुभयो ।’ “चार वर्षसम्म स्वदेशी बजार बुझेर, कस्तो सामान मान्छेले खोजी गरिरहेका छन् र कस्तो सामान बनाउँदा उपयुक्त हुन्छ भन्ने योजनामा समय खर्च गरेको उहाँले बताउनुभयो ।” यसरी लामो समयसम्म बजार बुझ्दा आफैले उद्योग खोलेर चलाउन सक्छु भन्ने सोच आएपछि अगाडि बढेको विगतको स्मरण उहाँले गर्नुभयो ।

“पुख्र्यौली सम्पत्ति भए पनि आफँैले केही नयाँ गर्छु भन्ने सोचका साथ आफैँले ऋण लिएर उद्योगको सुरुआत गरेँ,उहाँले भन्नुभयो, “ऋण तिर्नुपर्ने भएकाले पनि मेहनत गर्न सिकायो ।” मानिसमा मेहनत र लगनशीलता भयो भने स्वदेशमै केही गर्न सकिन्छ भन्ने सुझाव उहाँले युवालाई दिनुभएको छ । उहाँले भन्नुभयो, “कोसिस गरे स्वदेशमा जे पनि गर्न सकिन्छ, विदेशीनु पर्दैन । तर मान्छेमा मेहनत र लगनशीलता हुनुपर्छ ।” रासस 

सिएमसी अस्पतालमै दसैँको टीका, बिरामीका निधारमा खुसी र आँखामा भावुकता

जसले चाहेर पनि परिवारसँग दसैँको टीका लगाउन पाउँदैनन्

बिचौलियाको मारमा किसान