काठमाडौँ । नेपाल प्रहरीका पूर्व नायब उपरीक्षक (डिएसपी) कृष्णबहादुर खड्कालाई साईबर अपराध मुद्दामा ५० हजार जरीवाना हुने भएको छ ।जिल्ला अदालत काठमाडौंका न्यायधीश रामप्रसाद न्यौपानेको एकल इजलासले खड्कालाई खड्काले आफ्नो फेसबुक आईडीबाट बुहारीलाई अश्लील गालीगलौज गरेको अभियोगमा ५० हजार जरिवाना र जाहेरवालालाई २५ हजार क्षतिपूर्ति भराउने फैसला गरेको हो । खड्काकी बुहारी सुमना खड्काले साइबर अपराध भएको भन्दै महानगरीय अपराध महाशाखामा उजुरी दिएकी थिइन् । १५ दिनसम्म प्रहरी नियन्त्रणमा रहेका खड्का अदालतको आदेशमा १ लाख रुपैयाँ धरौटी बुझाएर रिहा भएका थिए । ‘प्रतिवादीको उमेर अवस्था, कसुर गर्दाको परिस्थिति समेतलाई हेर्दा प्रस्तुत मुद्दाका प्रतिवादीलाई न्यूनतम सजाय गर्दा पनि कानुनको मकसद पुरा हुने देखिँदा प्रतिवादी कृष्णकुमार खड्का क्षेत्रीलाई विद्युतीय (इलेकट्रोनिक्स) कारोबार ऐन, २०६३ को दफा ४७(१). विपरीतको कसुरमा सोही ऐनको दफा ४७(१) बमोजिम रु.५०,०००।(पचास हजार) जरिवाना हुने ठहर्छ। साथै जाहेरवाला पीडितलाई पुग्न गएको मानसिक पीडासमेत बापत प्रतिवादी कृष्णकुमार खड्का क्षेत्रीबाट जाहेरवाला पीडित मधु शाह भन्ने सुमना खड्कालाई रु.२५,०००।- (पच्चीस हजार) क्षतिपूर्ति भराई दिने ठहर्नुका साथै दसीको रूपमा बरामद मोबाइल फोन थान १ जफत हुने ठहर्छ।’ अदालतले हालै गरेको फैसलामा भनिएको छ ।