चितवन । नेपाल उद्योग वाणिज्य महासङ्घका अध्यक्ष चन्द्रप्रसाद ढकालले नेपालमा लगानीको सम्भावना बलियो हुँदै गएको बताउनुभएको छ । सार्वजनिक स्थान, सामाजिक सञ्जाललगायतका ठाउँमा नेपालमा केही हुँदैन भनेर एकप्रकारको भाष्य निर्माण गर्न खोजिएको भन्दै हल्लाको पछाडि नलाग्न ढकालले व्यवसायीलाई आग्रह गर्नुभयो । आज उद्योग वाणिज्य सङ्घ चितवनको ५८औँ वार्षिक साधारणसभा उद्घाटन गर्दै अध्यक्ष ढकालले नेपालमा वैदेशिक संस्थाबाट भित्रिने लगानीबाटमात्रै नभई आन्तरिक लगानीबाट ठूला आयोजना निर्माण गर्न सक्ने अवस्था रहेको बताउनुभयो ।

साधारणसभाका क्रममा उद्योगीहरुले आफूहरुका धेरै समस्याहरु रहेका भन्दै तिनीहरुको समाधानका लागि राज्यले उचित नीति निर्माण गर्नुपर्ने बताएका छन् । उद्योग वाणिज्य सङ्घ चितवनका अध्यक्ष सुमनकुमार श्रेष्ठले व्यवसायीको लगानी सुरक्षा, ऋणलगायतका क्षेत्रमा राज्यले सहुलियत प्रदान गर्नुपर्ने बताउनुभयो । मुलुकमा रहेका तीनवटै तहका सरकारले आर्थिक क्रियाकलाप सक्रिय हुनेगरी नीति तथा कार्यक्रम ल्याउनुपर्नेमा श्रेष्ठले जोड दिनुभयो ।

कार्यक्रममा व्यावसायिक सङ्घसङ्गठनका प्रतिनिधिसहित, जिल्लाका राजनीतिक दलका प्रतिनिधि, स्थानीय सरकारका प्रतिनिधि एवम् कर्मचारीहरुको सहभागिता रहेको थियो । वरिष्ठ उपाध्यक्ष चिरञ्जिवि सुवेदीले धन्यवाद ज्ञापन गर्नुभएको कार्यक्रमको सञ्चालन कार्यक्रम निर्देशक निलबहादुर केसीले गर्नुभएको थियो ।

दसैँ बिदापछि सिएमसीमा नियमित ओपीडी सेवा सुरु

दसैँमा सौराहामा आन्तरिक पर्यटकको चहलपहल कम

अर्को साता वर्षाको सम्भावना, अहिल्यै त्रसित नहुन मौसमविद्को आग्रह