काठमाडौँ । कोरोना महामारीको संकटका बिच नै अहिले मंसिर ९ गतेदेखि कक्षा १२ को परीक्षा संञ्चालन भइरहेको छ । बैशाखमा हुने भनिएको कक्षा १२ को परीक्षा कोरोना भाइरसका कारण स्थगित हुन पुगेको थियो । महामारी कहिलेसम्म भइरहने टुङ्गो नभएपछि पनिकाले परीक्षा मिति सार्वजनिक गर्यो । कक्षा १२ को परीक्षामा व्यापक मात्रामा अनियमितता भएको भन्दै अहिले एकदमै धेरै ट्रोलहरु बनेका छन् । केही दिन अघिमात्र परीक्षा केन्द्रमै परीक्षा दिइरहँदा टिकटक बनाएको र मोबाईलबाट चिट हेरेका केही सामाग्रीहरु सार्वजनिक भएका थिए । बुटवलका एक शिक्षकका अनुसार फिजिक्सको परीक्षा हुनुभन्दा १३ घण्टा अगाडी नै प्रश्नपत्र बाहिरिएर विद्यार्थीको फेसबुक ग्रुपमा आइसकेको थियो । यसबारेमा आजको नयाँ पत्रिकाले खबर पनि छापेको छ । नयाँ पत्रिकाले छापेको उक्त जानकारीअनुसार बुटवलमा अघिल्लो साँझ ७ बजे केही व्यक्तिमाझ प्रश्नपत्र पुगेको थियो । भोलिपल्ट पेपर पाएपछि शिक्षकहरुले सामाजिक संञ्जालमा आएको र परिक्षाको लागि मेलमा पठाएको पेपर एकै भएको देखेपछि तत्काल पनिकालाई जानकारी गराएका थिए । परीक्षा बोर्डका अधिकारीले गल्ती स्वीकार नगरी उल्टै शिक्षकलाई प्रहरी लगाएर समात्ने धम्की दिएपछि कुरा सेलायो । यसबारेमा राष्ट्रिय परीक्षा बोर्डका सदस्य सचिब, परीक्षा उपनियन्त्रक र प्रवेश परीक्षा कार्यलय प्रमुख पूर्ण जानकार रहेको उनी बताउँछन् । परीक्षा केन्द्रमा टिकटक बनाउनु र मोबाइलबाट चिट चोर्नुमा परीक्षा केन्द्रहरुकै ठूलो गल्ती देखिन्छ । परीक्षा केन्द्रहरु होम सेन्टर नै भएका कारण विद्यार्थीहरुलाई शिक्षकले खुलमखुल्ला छोडेकै कारण यस्तो ज्यादती बढेको प्रष्ट रुपमा देखिन्छ । यसरी लापरबाही ढंगले परीक्षा दिन लगाउने यही हो त हाम्रो शिक्षा प्रणाली ? छिट्टै नै त्रिभुवन विश्वविद्यालयको परीक्षा पनि हुने तयारीमा रहेको छ । त्रिविले परीक्षा मिति सार्वजनिक गरिरहँदा आम विद्यार्थीहरु अहिले परीक्षाको तयारीमा जुटेका छन् । कक्षा १२ मा भएको यस्तो अनियमितताले गर्दा स्नातक तहका विद्यार्थीहरुको मनोविज्ञानमा पनि यसले प्रभाव पार्न सक्छ । परीक्षा केन्द्रहरु जहाँ नै परेपनि यसरी भएको गरिएको अनियमितताले देशले दक्ष जनशक्ति चिन्न मुश्किल हुनेछ । कोरोनाले गर्दा धेरै मानिसहरु रोजगारविहीन भएका छन् । देशमा रोजगारीको अवस्था एकदमै नाजुक छ । राम्रो श्रेणी ल्याएर अध्ययनमा अब्बल भएकाहरुलाई पनि रोजगारी गौण रुपमा मात्र पाइन्छ । अब परिक्षा केन्द्रहरुमा यसरी प्रश्नपत्र बहिराइदिँदा विद्यार्थीहरुको फेसबुकको ग्रुपमा पुग्दा कस्ता जनशक्ति उत्पादन होलान् ? विभिन्न विद्यालयमा अध्ययन गर्ने विद्यार्थीहरुको पनि धारणा यही रहेको छ । काभ्रेको सर्बमंगला उच्च माध्यमिक विद्यालयमा कक्षा १२ मा अध्ययन गर्ने सबिना घिमिरे बताउँछिन् , “पढेर अध्ययन गरेर राम्रो अंक ल्याउने विद्यार्थीलाई यसरी प्रश्नपत्र पहिलै पाएर परीक्षा दिएका विद्यार्थी सरकारले कसरी चिन्न सक्छ ? चिन्नमा समस्या हुने र प्रश्नपत्र बाहिरिएर मोबाइलको चिट सारेकै भरमा राम्रो अंक ल्याउनेले अवसर पाउन सक्नेछन् । यसो हुँदा हामी दिनरात नभनी अध्ययन गरेर राम्रो अंक ल्याउनेले अवसर नै नपाइने पो हो की भन्ने डर रहेको पनि घिमिरे बताउँछिन् ।’ यसवर्ष कक्षा १२ को परीक्षा फारम भरेका सबै माध्यमिक विद्यालयहरुमा परिक्षा केन्द्रहरु बनाइएको थियो । देशभरमा १२ को परीक्षाको लागि चार हजार एक सय पाँच परीक्षा केन्द्र कायम भएका हुँन् । सरकारले विद्यार्थीहरुकै सहजतालई मध्यनजर गरेर आफैँले पढेको विद्यालयमा गएर परीक्षा दिन सम्भव नभएमा विद्यार्थी जहाँ रहेका छन् त्यही जिल्लाको नजिकको विद्यालयमा परीक्षा लिने व्यवस्था गरेको थियो । भने काठमाडौँ उपत्यका भित्रका जिल्लामा विद्यार्थी आफैले पढेका विद्यालयहरुमा परीक्षा दिन आउनुपर्ने व्यवस्था गरेको थियो । बोर्डले परीक्षा दिनका लागि प्रवेशपत्र अनिवार्य गरेको छ । कक्षा १२ मा ४ लाख ३३ हजार ६ सय परीक्षर्थी सामेल भएका छन् ।