स्वदेशमै रहेर पनि सेवा अवरुद्ध गर्न नहुने भएकाले स्वास्थ्य, सुरक्षा लगायत अत्यावश्यक वस्तुको सेवा प्रवाह गर्नेहरुले टीका थाप्नबाट बञ्चित हुन्छन् । अरुलाई सहज टीका लगाउन दिनका लागि सुरक्षा निकायमा खटिनेहरु टीका लगाउनबाट बञ्चित हुन्छन् ।

जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेल नब्बे प्रतिशत हाराहारी प्रहरी सेवामा रहेकाहरु घरमा गएर टीका थाप्नका लागि घर जान नपाउने बताउनुहुन्छ । उहाँले भन्नुभयो “सर्वसाधारणले सुरक्षित रुपमा चाडपर्व मनाउन भन्नका लागि हामी परिवारसँग टीका लगाउन पाउँदैनौं ।”

संवेदनशील जिल्लाहरुमा अन्यत्रबाट थप सुरक्षाकर्मी पठाएर सुरक्षा दिईने गरेको उहाँले बताउनुभयो । इञ्चार्जसीप लिएकाहरुले विदा पाउँदैनन् । अन्यले मिलाएर न्यूनतम संख्या मात्रै परिवारसँग दसैं मनाउने उहाँले जानकारी दिनुभयो ।

यस्तै नेपाली सेना, सशस्त्र प्रहरी, राष्ट्रिय अनुसन्धानमा कार्यरतहरु पनि यो पर्वमा परिवारसँग सबैले दसैँ मनाउन पाउँदैनन् ।

त्यसो त निजी क्षेत्रमा काम गर्ने सुरक्षागार्डहरुले पनि विदा नपाउने गरेको गढी सेक्युरिटीका सञ्चालक अश्विन गोले बताउनुहुन्छ । चाडपर्वको समयमा कतिपय उद्योग व्यवसाय बन्द हुने हुँदा सुरक्षाको जिम्मेवारी सुरक्षागार्डको हुने भएको विदा नपाउने उहाँको भनाई छ । उहाँले भन्नुभयो “चाडपर्वमा सुरक्षा दिन थप जनशक्ति माग हुने गर्दछ ।”

भरतपुर अस्पतालका प्रमुख मेडिकल सुपरिटेण्डेण्ट डा. विश्वबन्धु बगाले ३० प्रतिशत चिकित्सक, नर्स र स्वास्थ्यकर्मी अस्पतालमा नै रहने भएकाले उनीहरुले परिवारसँग दसैंको टिका थाप्न नपाउने बताउनुहुन्छ । बहिरंग सेवा बाहेक आकस्मिक र अन्तरंग सेवाहरु सुचारु हुने भएकाले चिकित्सक, स्वास्थ्यकर्मी र सरसफाईकर्मीहरु विदा बस्न नपाउने उहाँको भनाई छ । उनीहरुले दसैं र तिहार पालो मिलाएर विदा लिने गर्दछन् । बगालेले भन्नुभयो “जुनसुकै बेला सेवा दिनु पर्ने भएकाले तयारी अवस्थामा हुनुपर्छ ।”

पर्वको समयमा अधिकांश समय नर्सिङ कर्मचारीले समय दिने गर्दछन् । नेपाल नर्सिङ संघ चितवनका अध्यक्ष विष्णु अधिकारी ५० प्रतिशत नर्सले विदा लिएर बस्न नपाउने बताउनुहुन्छ । उहाँले भन्नुभयो “दसैं र तिहार मध्ये आलो पालो गरेर विदा मिलाईन्छ ।” जसका कारण ५० प्रतिशत नर्सले दसैंमा परिवारसँग टीका थाप्न नपाउने उहाँको भनाई छ ।

विदेशमा ठूलो संख्यामा नेपाली छन् । उनीहरु मध्ये अधिकांशले परिवारसँग बसेर टीका लगाउन पाउँदैनन् । कतिपयले एकाघरको परिवारलाई उतै बोलाउँछन् भने कतिपयले विदा मिलाएर दसैंमा नेपाल आउने गर्दछन् ।

चार बर्षपछि बुबा आमाको हातबाट टीको लगाउन चितवनको रत्ननगर आईपुग्नु भएका विष्णु पौडेल पर्वमा परिवारसँग बस्न पाउनु निकै खुशीको कुरा हुने बताउनुहुन्छ । उहाँले भन्नुभयो “विदेशमा रहनेहरुले परिवारसँग कमैले मात्र पर्व मनाउन पाउँछन् ।”

यस्तै अन्य क्षेत्रमा पेशा गर्नेहरु पनि टीका लगाउनबाट बञ्चित हुन्छन् । सञ्चार क्षेत्र, यातायत, सरसफाई, हस्पिटालिटी क्षेत्रमा काम गर्नेहरु पनि सबैले परिवारसँगै बसेर टीका थाप्न पाउँदैनन् । आलो पालो गरेर उनीहरुले काम गर्छन् । घरबाट टाढा रहेर स्वदेशमै भएपनि खर्चको अभाव चाहेर पनि घर पुग्न नसक्नेहरु पनि छन् ।