चितवन । नेपालकी बी–फार्मेसी विद्यार्थी सुप्रिया अधिकारीले सामाजिक सञ्जाल फेसबुकको प्राविधिक कमजोरी पत्ता लगाएर रिपोर्ट गरेपछि मेटाबाट ३ हजार ७५० अमेरिकी डलर पुरस्कार पाउने भएकी छन्। उक्त रकम नेपाली रुपैयाँमा करिब ६ लाख रुपैयाँ बराबर हुन्छ।

अधिकारीले फेसबुकमार्फत सार्वजनिक गरेको जानकारीअनुसार उनले मेटाको प्रणालीमा रहेको एउटा प्राविधिक कमजोरी पहिचान गरी कम्पनीलाई रिपोर्ट गरेकी थिइन्। उनको रिपोर्टको मूल्याङ्कनपछि मेटाले त्यसलाई स्वीकार गर्दै कमजोरी पहिचानमा पुर्‍याएको योगदानको कदरस्वरूप बग बाउन्टी पुरस्कार दिने निर्णय गरेको हो।

प्रविधिको क्षेत्रमा निरन्तर सिकाइ, मेहनत र रुचिका कारण यो उपलब्धि हासिल गर्न सफल भएको अधिकारीले बताएकी छन्। उनले आफ्नो सफलतामा साथ, हौसला र प्रेरणा प्रदान गर्ने सबैप्रति आभारसमेत व्यक्त गरेकी छन्।

फेसबुकको मूल कम्पनी मेटाले आफ्नो प्रणालीमा रहेका सुरक्षा कमजोरी जिम्मेवार ढङ्गले पहिचान गरी रिपोर्ट गर्ने अनुसन्धानकर्तालाई बग बाउन्टी कार्यक्रममार्फत आर्थिक पुरस्कार प्रदान गर्दै आएको छ। यस कार्यक्रमको मुख्य उद्देश्य प्रणालीमा रहेका सम्भावित सुरक्षा जोखिम समयमै पत्ता लगाउनु र प्रयोगकर्ताको व्यक्तिगत विवरण तथा अन्य संवेदनशील सूचनाको सुरक्षा सुनिश्चित गर्नु हो।

सुप्रिया अधिकारीको यो उपलब्धिले प्रविधि र साइबर सुरक्षाको क्षेत्रमा नेपाली युवाको सम्भावना उजागर गरेको छ। साथै, यसले विद्यार्थीहरूलाई नयाँ प्रविधि सिक्न, अनुसन्धान गर्न र डिजिटल सुरक्षाको क्षेत्रमा आफ्नो क्षमता विकास गर्न प्रेरित गर्ने अपेक्षा गरिएको छ।

तीन महिनामा २० हजारभन्दा बढीले गरे पाथीभराको दर्शन, ३३ लाख २६ हजार भेटी संकलन

सिएमसी अस्पतालमै दसैँको टीका, बिरामीका निधारमा खुसी र आँखामा भावुकता

जसले चाहेर पनि परिवारसँग दसैँको टीका लगाउन पाउँदैनन्