चितवन । चितवनको नारायणगढमा सञ्चालनमा रहेका चार वटा होटलहरुले खाद्य स्वच्छताको स्टिकर पाएका छन् । खाद्य प्रविधि तथा गुण नियन्त्रण डिभिजन कार्यालय चितवनले सोमबार होटलहरुको स्तरीकरण तथा लोगो वितरण गरेको हो । होटलहरुको किचन, प्रदान गर्ने सेवा सुविधा, सरसफाइलगायतलाई आधार बनाएर होटललाई स्तरीकरण गर्दै लोगो वितरण गरिएको खाद्य अनुसन्धान अधिकृत घननाथ अधिकारीले बताउनुभयो । होटलले पालना गरेको खाद्य स्वच्छताको आधारमा उनीहरुले स्टिकर पाएका अधिकारीको भनाइ छ ।

नारायणगढका सात वटा होटलहरुमा गरिएको अनुगमनका क्रममा चार वटा होटल मात्रै स्तरीकरणमा परेका अधिकारीले बताउनुभयो । कार्यालयका खाद्य निरीक्षक प्रदीप काफ्लेकाअनुसार नारायणगढमा सञ्चालित मुक्तिनाथ होटल, होटल न्यू हेभन र होटल ह्याप्पी होमले हरियो रङ्गको दुई वटा स्टार पाएका छन् । त्यस्तै न्यू होटल होली डे होमले भने पहेँलो स्टिकर मात्रै प्राप्त गरेको काफ्लेले बताउनुभयो । होटलले पाएको अङ्कको आधारमा स्टिकर प्रदान गरिएको काफ्लेले बताउनुभयो ।

जम्मा १०० पूर्णाङ्कमा होटलको स्तरीकरण गरिएकोमा ५० देखि ६४ अङ्क प्राप्त गर्ने होटलले पहेँलो, ६५ देखि ७९ अङ्क प्राप्त गर्ने होटलले हरियो रङ्गको एक स्टार, ८० देखि ८९ अङ्क प्राप्त गर्ने होटलले हरियो रङ्गको दुई स्टार तथा ९० देखिमाथि अङ्क प्राप्त गर्ने होटलले हरियो रङ्गको तीन स्टार प्राप्त गर्दछन् । स्टार पाएका होटलहरुको पुनः अनुगमन गरिने भन्दै काफ्लेले छ महिनापछि हुने अनुमगनका क्रममा गुणस्तर नभेटिए उनीहरुको स्टिकर जफत समेत हुनसक्ने बताउनुभयो ।

खाद्य प्रविधि तथा गुण नियन्त्रण डिभिजन कार्यालय चितवनको नेतृत्वमा भएको सो स्तरीकरण तथा लोगो वितरण कार्यक्रममा उपभोक्ता अधिकार संरक्षण मञ्च चितवन, होटल व्यवसायी संघ चितवन र पत्रकारहरुको सहभागिता रहेको थियो ।

दसैँ बिदापछि सिएमसीमा नियमित ओपीडी सेवा सुरु

दसैँमा सौराहामा आन्तरिक पर्यटकको चहलपहल कम

अर्को साता वर्षाको सम्भावना, अहिल्यै त्रसित नहुन मौसमविद्को आग्रह