नवलपुर | पूर्व पश्चिम राजमार्गका मध्यभागमा पर्ने पूर्वी नवलपरासीपूर्व कावासोती जंगलमा आज बिहान ११ बजेतिर ठूलो दुर्घटना भएको सूचना आयो ।  सूचना आएको २ मिनेटमै जिल्ला प्रहरी कार्यालय नवलपुरको प्रहरी भ्यान घटनास्थल पुग्यो । प्रहरी भ्यान पुगेलगत्तै चार वटा एम्बुलेन्स पनि आइपुगे ।

राजमार्गमा बस र ट्रकको बीचमा मोटरसाइकल च्यापिएको देखिन्थ्यो । सडकमा दुई जना रक्ताम्मे अवस्थामा पल्टिएका थिए । बसका यात्रुहरु चिच्चाइरहेका थिए । एकाएक प्रहरीले उद्धार गरी घाइतेहरुलाई स्ट्रे्चरमा राखेर एम्बुलेन्समा चढाइरहेका थिए । घाइतेको उद्धार गर्न झण्डै १५ मिनेट लाग्यो । दुई जनाको घटनास्थलमा नै मृत्यु भएको र घाइतेको उद्धार गरी मध्यबिन्दु जिल्ला अस्पताल पठाइएको प्रहरीले घटनास्थलमै जानकारी दियो ।

तर, यो सबै वास्ताविक दुर्घटना नभई प्रहरीले सडक दुर्घटना विपद् व्यवस्थापनको नमुना अभ्यास गरेको थियो । दुर्घटना भनिएको बसका यात्रुहरु चिच्याउँदै ओर्लिँदा सडकमा देख्ने अन्य यात्रुहरु पनि झुक्किए । गण्डकी प्रदेश आन्तरिक मामिला मन्त्रालयकै आयोजनामा प्रहरीले विपद व्यवस्थापन कसरी गर्ने भनी नमुना अभ्यास गरिएको र यस्तो अभ्यास प्रदेशका सबै जिल्लामा भइरहेको गण्डकी प्रदेशको आन्तरिक मामिला मन्त्रालयका अधिकृत प्रकाशशरण ढुंगानाले बताए ।

पूर्वपश्चिम राजमार्गको बुटवल नारायणघाट सडक खण्डमा सबै भन्दा बढी सवारी दुर्घटना हुने गरेको छ । सवारी दुर्घटना न्यूनीकरण गर्न विभिन्न किसिमको जनचेतनामूलक कार्यक्रम गर्दै आए पनि दुर्घटना भइसकेपछि उद्धार कसरी गर्ने भन्ने कुराको अभ्यास आवश्यक भएको प्रहरीको भनाइ छ । राजमार्गको यो खण्डमा सडक दुर्घटना अत्याधिक हुने भएकाले दुर्घटनापछि घाइतेको उद्धार छिटो-छरितो र सुरक्षित तवरले गर्नका लागि यस्तो अभ्यास प्रभावकारी भएको जिल्ला प्रहरी कार्यालय नवलपरासीपूर्वका प्रमुख प्रहरी उपरीक्षक प्रकाश मल्लले बताए ।

घटना भइसकेपछि उद्धार गर्न ढिलाई गरिँदा पनि घाइतेको ज्यान जाने गरेको छ भने सही तरिकाले उद्धार गरिएमा शरीरका अंगहरुमा हुने क्षति कम गर्न सकिन्छ ।

अर्को साता वर्षाको सम्भावना, अहिल्यै त्रसित नहुन मौसमविद्को आग्रह

तिब्बतमा ७ म्याग्निच्युडको भूकम्प, १६ जनाको मृत्यु

आगामी तीन दिन देशका अधिकांश स्थानमा मौसम सफा रहने