चितवन  । नेपाली कांग्रेसका चर्चित एवं लोकप्रिय युवा नेता राजेश्वर खनालले जिल्ला सभापतिमा उम्मेदवारी घोषणा गरेका छन् । आगामी १० हुने जिल्ला कांँग्रेसको १४ औं महाधिवेशन अन्र्तगत जिल्ला सभापति पदमा उम्मेदवारी दिने घोषणा गरेका हुन् । आज भरतपुरमा आयोजित पत्रकार मिलन कार्यक्रममा बोल्दै खनालले आफु जिल्ला सभापति भएको खण्डमा आगामी पाँच वर्षसम्म अन्य कुनै पनि पदको आकांक्षा नराख्ने प्रतिबद्धता जनाएका छन् ।

‘मैले जिल्लामा कांग्रेसलाई सुदृढिकरण गर्दै अगाडि लैजाने योजना बनाएको छु’ खनालले भने, ‘आगामी निर्वाचनमा चितवनमा कांग्रेस एक्लैले ५१ प्रतिशत जनमत प्राप्त गर्नेगरी काम गर्नेछु ।’ एउटै व्यक्ति धेरै पदमा आकांक्षा राख्न नहुने खनालको तर्क थियो । आफूलाई सभापति पदमा सहयोग गर्न आग्रह गर्दै खनालले महाधिवेशन प्रतिनिधिको निर्वाचनपछि प्यानल नै निर्माण गरेर अधिवेशनमा जाने उनले प्रष्ट पारे । कांग्रेसको महाधिवेशन अन्तर्गत मंसिर ३ गते क्षेत्रीय अधिवेशन तथा ६ गते महाधिवेशन प्रतिनिधिको अधिवेशन हुँदैछ ।

‘६ गतेको अधिवेशन पछि जिल्लामा पदाधिकारीसहितको फाइनल टिम घोषणा गर्नेछु’ खनालले भने, ‘८ गतेसम्म फाइनल टिम घोषणा गर्नेछु, जुन टिमले नेपाली कांग्रेसलाई सही ढंगबाट दिशानिर्देश गर्नेछ ।’ नेता खनालले आफ्नो उम्मेदवारी नेपाली कांग्रेसको पूर्व संस्थापन पक्षबाट हुने घोषणा समेत गरेका छन् । सेवामुखी राजनीतिलाई मुख्य नारा बनाएर चुनावी मैदानमा होमिएको उनको भनाई छ । खनालले पार्टीभित्रको गुटगत, जातिगत र क्षेत्रगत समस्याहरु आफू निर्वाचित भएपछि अन्त्य हुने दाबी गरे ।

खनालले उम्मेदवारीसँगै आफ्नो घोषणापत्र सार्वजनिक गर्दै केन्द्रीय निर्देशन कार्यान्वयन, कार्यालय व्यवस्थापन र सूचना प्रणाली, संस्थागत निर्णयको परिपाटी, क्षेत्रीय प्रतिनिधि, महासमिति, महाधिवेशन प्रतिनिधिलाई जिम्मेवारी, सल्लाहकार परिषद्को व्यवस्था, उपविजेता तथा निर्वाचनमा असफल भएकाहरुको व्यवस्थापन, प्रशिक्षणको व्यवस्था, संघीय, प्रदेश र स्थानीय निर्वाचन तयारी एवं कार्य व्यवस्थापन गर्ने बताएका छन् । नेविसंघ चितवनको नेतृत्व गर्दा स्ववियू निर्वाचनमा पहिलो संगठन र तरुणदलको सचिवको भूमिकामा हुँदा पार्टीले जिल्लाका चार वटै निर्वाचन क्षेत्रमा विजयी हासिल गरेको खनालले बताए ।

जिल्लाका नेता कार्यकर्ताको हौसला र साथले आफूलाई थप उत्साहा जागेको उनको भनाइ छ । खनालले पार्टीभित्र अन्तरद्वन्द्व भएपनि बाहिर निस्कदा हार्दिकता रहेको बताए । ‘अहिले हुने कांग्रेसको आन्तरिक निर्वाचन हो अधिवेशनको समयमा पार्टीभित्र जुन अवस्था देखिन्छ, बाहिर निस्किएपछि हाम्रो हार्दिकता रहन्छ’ खनालले भने । चितवनमा नेपाली कांग्रेसको जिल्ला सभापति पदका लागि खनालसहित हालसम्म ८ जना आकांक्षी देखिएका छन् ।

निर्माण व्यवसायी संघ चितवनको सदस्य पदमा युवा व्यवसायी रोबन दवाडी (रोयल) को उम्मेदवारी

निजी विद्यालयको ३० प्रतिशत शुल्क वृद्धि फिर्ता गराउन दलहरूद्वारा दबाब दिने

बिहीबारदेखि देशका विभिन्न क्षेत्रमा वर्षा हुने