जिल्ला सभापति नागेन्द्रकुमार राय प्रधानमन्त्री एवं पार्टीका केन्द्रीय सभापति शेरबहादुर देउवा पक्ष अर्थात् संस्थापन र पूर्व जिल्ला सभापति लक्ष्मण राय वरिष्ठ नेता रामचन्द्र पौडेल समूह संस्थापनइतर पक्षका हुन् । यी दुई समूहको विवादले जिल्लामा कांग्रेसको पटक-पटक जिल्ला अधिवेशन अन्योलमा पर्दै आएको थियो । यसअघि दुई समूहबीच मतदान अधिकृत खटाउने र निर्वाचन अधिकृतको कार्यालय राख्ने विषयमा विवाद हुँदा दुईजना निर्वाचन अधिकृतले जिल्ला अधिवेशन प्रक्रिया नै गराउन नसकी राजीनामा बुझाएर फर्किएका थिए ।

यसपछि गत शनिबार केन्द्रीय निर्वाचन समितिले दुवै पक्षका नेताहरूलाई बोलाएर चार दिनसम्म पार्टी केन्द्रीय कार्यालय सानेपामा छलफल गराई मंगलबार मात्र सहमति गराए र जिल्ला पठाएको हो । जिल्ला फर्किएलगत्तै निर्वाचन अधिकृत राउतले काठमाडौंमा भएको सहमतिअनुसार १० मंसिरमा २० वटा पालिकाका दुई सयवटै वडामा वडाअधिवेशन गराउने तयारी गरेका थिए । तर, दुई समूहबीच फेरि क्रियाशील सदस्यता थपिएको र मतदान अधिकृत खटाउने विषयमा विवाद उत्पन्न भएपछि अचानक शुक्रबारका लागि तयभएको वडा अधिवेशन स्थगित भएको थियो । दुुई पक्षको विवादका कारण देशैभरिमा सर्लाहीमा मात्रै कांग्रेसको अधिवेशन प्रक्रिया अघि बढ्न सकेको छैन ।