फाउण्डेशनले रु.१७ करोडभन्दा बढी ऋण तिर्न बाँकी रहेको महानगरलाई अनुरोध गरेको पत्रमा उल्लेख छ । महानगरका प्रमुख प्रशासकीय अधिकृत रामवन्धु सुवेदीले कार्यपालिकाको बैठकले निर्णय गरी फाउण्डेशनले पेश गरेको विवरणको आर्थिक र प्राविधिक पक्षको अध्ययनका लागि सघन सहरी तथा भवन निर्माण आयोजना भरतपुरमा पठाएको छ । यसैगरी नेपाल चार्टर एकाउन्टेन्ट संस्थामा आर्थिक अध्ययनका लागि पठाईदै छ । दुवै निकायबाट जाँचबुझपछि खेलकुद मन्त्रालय हुँदै मन्त्रीपरिषद् बैठकमा पठाउने तयारी गरिएको हो । सुवेदीले नेपाल सरकारको नीति नियम अनुसार आवश्यक प्रक्रिया पु¥याएर रंगशाला निर्माणको कामलाई पूर्णता दिने बताउनुभयो ।

आर्थिक अभावका कारण विगत पाँच महिनादेखि रंगशाला निर्माणको काम हुन सकेको छैन । उधारो आर्थिक व्ययभार बढ्दै गएको र आर्थिक संकलन हुन नसकेको भन्दै काम रोकिएको हो । फाउण्डेशनका अध्यक्ष सितारामकट्टेलले चरम आर्थिक संकटबाट गुज्रिएपछि काम रोक्नु परेको बताउँदै आउनु भएको थियो । उहाँले जनस्तरबाट रकम उठ्ने सम्भावना पनि नभएको र सरकारले नदिएका कारण आर्थिक संकट आएको बताउनुभयो ।

रंगशालाको भौतिक पूर्वाधारको ३५ प्रतिशत काम सकिएको फाउण्डेशनले दावी गरेको छ । रंगशालामा अहिलेसम्म रु. ५४ करोड ६२ लाख २१ हजार खर्च भैसकेको यस अघि नै फाउण्डेशनले दावी गरेको थियो । रंगशाला सम्पन्न गर्न रु.३ अर्ब हाराहारी खर्च हुने अनुमान गरिएको छ । रंगशालाको बि.सं. २०७५ माघ १६ गते काठमाण्डौंमा तत्कालिन प्रधानमन्त्री, पूर्व प्रधानमन्त्रीहरुको उपस्थितिमा भरतपुर महानगरसँग विशेष सम्झौता भई काम अघि बढाईएको थियो ।