भरतपुर । भरतपुर महानगरपालिकाको बजेटमा निर्माण हुन लागेको प्रेमबस्ती दुग्ध उत्पादक सहकारी संस्थाको भवनको शिलान्यास गरिएको छ । चारकोठे भवनको महानगरका प्रमुख प्रशासकीय अधिकृत प्रेमराज जोशीले बिहीबार शिलान्यास गरेका हुन् । भवन निर्माणका लागि ४३ लाख ६८ हजार रूपैयाँ लाग्ने अनुमान गरिएको छ ।
सुरूको चरणमा असोजभित्र डिपिसी गर्ने गरी महानगरले १० लाख रूपैयाँ दिएको हो । भवन शिलान्यासपछि बोल्दै प्रमुख प्रशासकीय अधिकृत जोशीले उत्पादनसँग सम्बन्धित सहकारीलाई महानगरले प्रोत्साहन गर्नुपर्ने बताए । गुणस्तरमा ध्यान दिएर आमउपभोक्तालाई विश्वास दिलाउन सके दूध उत्पादन आम्दानीको राम्रो स्रोत हुने उनको भनाइ छ ।
पशुपालनलाई नै प्रोत्साहन दिनका लागि महानगरको ३२ करोड आन्तरिक आम्दानी हुँदा पशुपालनलाई सात करोड छुट्टयाइएको उनले बताए । ‘हामीले अहिले पनि हरेक वडामा पशु प्राविधिक, पशु आहार, यान्त्रिकीकरण र फार्म व्यवस्थापनलगायतका योजनाहरु समावेश गरेका छौँ’, उनले भने, ‘भरतपुर कृषि क्षेत्र हो वा व्यावसायिक क्षेत्र हो, त्यसमा स्पष्ट हुनुपर्छ । अनुदानले मात्रै मानिसलाई धेरै आश्रित बनाउन सक्ने भन्दै परिश्रममा नै बढी केन्द्रित हुनुपर्ने उनले बताए ।
भवन निर्माण सम्पन्न गर्न थप बजेटको व्यवस्थाका लागि पहल गर्ने भरतपुर–७ का वडाध्यक्ष राजेन्द्रमणि काफ्लेले बताए । भवन निर्माण गरेरमात्रै नहुने भन्दै उनले दूध उत्पादन र संकलनलाई पनि बढाउनुपर्ने बताए । पशुपालनलाई प्रोत्साहन गर्न वडाले पशु बिमा कार्यक्रम पनि सुरू गर्न लागेको उनको भनाइ छ ।
व्यावसायिक पशुपालक दूध उत्पादक कृषक समाज नेपालका केन्द्रीय अध्यक्ष एवम् सहकारीको भौतिक पूर्वाधार व्यवस्थापन उपसमिति संयोजक आनन्द न्युरेले वडामा भेटेरिनरी प्राविधिकको अभाव भएकाले प्राविधिकको व्यवस्था गरिदिन महानगरलाई आग्रह गरे । ‘दूधको मूल्यबाट नाफा राखेर भवन बनाउन सक्ने अवस्था छैन’, उनले भने, ‘कृषि सहकारीको भौतिक पूर्वाधार र मेसिनरीमा राज्यले पूर्ण अनुदानको व्यवस्था गर्नुपर्छ, यसको अन्तर्राष्ट्रिय कानुन पनि छ ।’ आगामी दुई वर्षभित्र संस्थालाई जिल्लाकै नमुना सहकारी बनाउने योजना रहेको उनले बताए ।
सहकारी विगत २० वर्षदेखि आफ्नै दुई कट्ठा जग्गामा सामान्य ब्लकको घरमा बस्दै आएको छ । पक्की भवन नहुँदा दाना, चोकर भण्डारण र यन्त्र जडानमा समस्या भएको प्रेमबस्ती दुग्ध उत्पादक सहकारी संस्थाका अध्यक्ष केशव पण्डितले बताए । केही समयमा नै संस्थाले एनालाइजर फिट गरी कम्प्युटर प्रणालीबाट दूधको गुणस्तर मापन गर्ने उनले बताए ।

सिएमसी अस्पतालमै दसैँको टीका, बिरामीका निधारमा खुसी र आँखामा भावुकता

जसले चाहेर पनि परिवारसँग दसैँको टीका लगाउन पाउँदैनन्

उपराष्ट्रपतिबाट बडादसैँको टीका ग्रहण