गैंडाकोट । गैंडाकोट नगरपालिकास्थित वडा नम्बर-२ मा कोरोना संक्रमितको संख्या बढ्दै गएपछि नगरपालिकाले निषेधाज्ञालाई कडाई गर्ने भएको छ । आज मंगलबार राति १२ वजेदेखि वडा नम्बर- २ मा घर बाहिर समेत निस्कन नपाउने गरि हिँडडुल तथा आवातजावतलाई कडाई गर्ने तयारीमा नगरपालिका जुटेको हो । गैंडाकोट नगरपालिकाभित्र समुदायस्तरमा १९ जनामा कोरोना संक्रमण देखिएकोमा यस वडामा मात्रै सबैभन्दा बढी ११ जना छन् ।समुदायस्तरमा संक्रमित बढ्न थालेपछि नगरपालिकाले वडा नम्बर- २ मा निषेधाज्ञालाई कडा बनाउन लागेको हो । यस वडाको भृकुटीचोकदेखि उत्तरतर्फ वडा नम्बर- १ को सिमानाहुँदै पूर्वतर्फको सिमाना नागरिक कलेजसम्मको क्षेत्र, पुलचोक, नारायणी नदि किनार, ईलाका प्रहरी कार्यालयदेखी दक्षिण एसपिएम टोल विकास संस्थाको क्षेत्रमा कोही पनि घर बाहिर निस्कन नपाईने गरि बन्देज लगाईएको हो । यस क्षेत्रको फोहरमैला पनि उक्त अबधिभर संकलन नहुने समेत बताइएको छ ।
समुदाय स्तरमा नै कोरोना पुष्टि भएपछि वडामा घरबाट बाहिर निस्कनसमेत नपाउने गरी पूर्णरुपमा बन्देज लगाईएको नगरप्रमुख छत्रराज पौडेलले जानकारी दिए । `मंगलबार राति १२ बजेदेखि १५ गते राति १२ बजेसम्मका लागि अत्यावश्यक बाहेकका सबै व्यवसाय बन्द हुनेछन्´- नगरप्रमुख पौडेलले भने – `टोल विकास संस्थाले नगरपालिका र प्रहरीसँगको समन्वयमा स्वयंसेवक परिचालन गरि निषेधाज्ञालाई पूर्णरुपमा पालना गराउन समन्वय गर्नेछन् ।´
वडा नम्बर- २ का अध्यक्ष ध्रुवराम पौडेलले वडावासी सबैलाई सुरक्षित रुपमा घरभित्रै बस्न आग्रह गर्दै वडावासीकै सहयोग पुुगेमा मात्रै कोरोना संक्रमणलाई न्यून गर्न सकिने भएकाले नगरले गरेको अपीललार्ई साथ दिन आग्रह गरेका छन् । राजनीतिक दल, वडा समिति, उद्योग वाणिज्य संघ, रेडक्रस, सञ्चार माध्यम, गैरसरकारी संस्था, सहकारी, महिला समूह, वित्तीय संस्था लगायत सबैले आआफ्नो समितिका सदस्यलाई महामारी नियन्त्रणमा आआफ्नो स्थानबाट सक्रिय भई सचेत नागरिकको भूमिका निर्वाह गर्न नगरपालिकाले निकालेको विज्ञप्तिमा उल्लेख छ ।
गैंडाकोट नगरपालिकाका स्वास्थ्य शाखा प्रमुख झलकराज पौडेलका अनुसार गैंडाकोट नगरपालिकामा कुल सङ्क्रमितको संख्या ७३ पुगेको छ । नगरमा हाल सक्रिय कोरोना सङ्क्रमितको संख्या १४ रहेको छ ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.