चितवन । विद्यार्थीको व्यक्तित्व विकासका लागि विद्यार्थी गुणीय चक्र (क्वेष्ट) नेपालको आयोजना तथा स्मल हेभन मोडेल स्कुल भरतपुरको संयोजनमा विद्यार्थी गुणीय चक्रको राष्ट्रिय सम्मेलन चितवनमा हुने भएको छ । मंसिर ८ देखि १० गतेसम्म चितवनको पर्यटकीय नगरी सौराहामा विद्यार्थी गुणीय चक्रको १७औँ राष्ट्रिय सम्मेलन हुन लागेको हो ।
यसअघिका १६ वटा राष्ट्रिय सम्मेलनमा देशका विभिन्न भागमा सम्पन्न भएको भन्दै यो सम्मेलनमा चितवनमा पहिलो पटक आयोजना गरिएको सम्मेलनका संयोजक एवं क्वेष्ट नेपालका अध्यक्ष सुरिना सुनयनी गुरुङले जानकारी दिनुभयो । सम्मेलन विद्यार्थीको चौतर्फी विकासका लागि महत्वपूर्ण हुनेसमेत गुरुङको भनाइ छ । राष्ट्रिय सम्मेलनमा देशभरका विभिन्न ७० वटा विद्यालयका करिब छ सय विद्यार्थी, पर्यवेक्षक, शिक्षक, प्रधानाध्यापक तथा शिक्षाविद्हरुको सहभागिता रहने गुरुङले बताउनुभयो ।
उहाँकाअनुसार देशका पूर्वदेखि पश्चिमसम्मका विभिन्न क्षेत्रका २१ वटा हबबाट सम्मेलनमा विद्यार्थीहरु सहभागी हुनेछन् । जिल्लाका विभिन्न विद्यालयहरुलाई समेटेर हब निर्माण गरिएको गुरुङको भनाइ छ । सम्मेलनबारे जाानकारी दिन आज आयोजना गरिएको पत्रकार सम्मेलनमा क्वेष्ट नेपालका प्रमुख संरक्षक दिनेशप्रसाद चापागाईले संस्थाले विद्यार्थी केन्द्रित कार्यक्रम गर्दै आएको बताउनुभयो । पछिल्लो समय विद्यार्थीहरु किताबी ज्ञानमा अब्बल भएर विदेशीने क्रम बढ्दै गएको भन्दै चापागाईले विद्यार्थीहरुमा असल संस्कारको कमी भएको बताउनुभयो ।
विद्यार्थीलाई संस्कारी र मेधावी बनाउने उद्देश्यले क्वेष्ट नेपालले विद्यालयमा कार्यक्रम गर्दै राष्ट्रिय सम्मेलनमा विद्यार्थीहरुलाई सहभागी गराउने गरेको बताउनुभयो । राष्ट्रिय सम्मेलनका सह–संयोजक एवं स्मल हेभन मोडल स्कुलका प्रिन्सिपल विमलकुमार क्षेत्रीले सन् २००५ देखि देशका विभिन्न शैक्षिक संस्थाहरुमा यस कार्यक्रम लागू गरिएको बताउनुभयो । हाल देशका पाँच सय भन्दा बढी विद्यालयमा पाठ्यक्रम विकासकै सहपाठ्यक्रमको रुपमा विद्यार्थी गुणीय चक्र सञ्चालन तथा पठनपाठन भइरहेको क्षेत्रीले बताउनुभयो ।
विद्यार्थीले गुणीय चक्रमार्फत छ महिना लगाएर गरेको कार्य र अध्ययनको प्रतिवेदन प्रस्तुत गर्ने भन्दै क्षेत्रीले ती प्रस्तुतीमा विद्यार्थीले कसरी समस्याको पहिचान, विश्लेषण र समाधान गरे र उनीहरुले आफ्नो व्यक्तित्व विकास तथा विद्यार्थी गुणीय चक्रबाट अन्य फाइदा के पाए भन्ने विषयमा प्रस्तुतीकरण गर्ने बताउनुभयो । तीन दिनसम्म चल्ने सम्मेलनमा विद्यार्थीले समूहगत छलफल, रेडियो उद्घोषणसम्बन्धी कार्यशाला, सांस्कृतिक आदानप्रदान, संरक्षण सम्बन्धी कार्यशालालगायतका विविध विधामा सहभागिता जनाउनेछन् ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.