चितवन । नेपाल–भारत विकास सहकार्यअन्तर्गत रत्ननगर–६ मा रहेको बछौली माविमा प्राविधिक कलेज सञ्चालनका लागि भवन निर्माण शिलान्यास गरिएको छ । १२ कोठा रहने तीनतले भवनको शिलान्यास भारतीय महावाणिज्य दूतावास वीरगन्जका महावाणिज्यदूत देवी सहाय मीना र रत्ननगर नगरपालिकाका नगरप्रमुख प्रलाद सापकोटाले संयुक्तरूपमा गरेका हुन् । भवन शिलान्यासपश्चात् कार्यक्रमलाई सम्बोधन गर्दै भारतीय महावाणिज्य दूतावास वीरगन्जका महावाणिज्यदूत देवी सहाय मीनाले भारत सरकारको तीन करोड रुपैयाँ बढी लागत साझेदारीमा विद्यालय भवन निर्माण हुन लागेको र यसले बछौली माविको शैक्षिक उन्नयनमा सहयोग पुग्ने विश्वास व्यक्त गरे ।

उनले भारत सरकारले सामुदायिक विकास परियोजना (एचआइसिडिपिएस)अन्तर्गत स्कुल, कलेज, अस्पताल, स्वास्थ्यचौकी, पुस्तकालय, नदी तटबन्ध, एम्बुलेन्स, स्कुल बसजस्ता सहयोग परियोजनाहरु उपहारस्वरुप प्रदान गर्दै आएको जानकारी दिए । नेपाल–भारतबीच निकटतम छिमेकीको सम्बन्ध रहिआएको र दुवै राष्ट्रबीच प्राचीनकालदेखि नै सामाजिक, सांस्कृतिक, धार्मिक समानता र बहुआयामिक सुसम्बन्ध कायम रहेको बताउँदै महावाणिज्यदूत देवी सहाय मीनाले शिक्षा, स्वास्थ्य र भौतिक पूर्वाधारहरुको विस्तार गरी नेपाली जनताको समृद्धि र विकासमा भारत सरकारको निरन्तर सहयोग रहिरहने प्रतिबद्धता व्यक्त गरेका छन् ।

कार्यक्रममा रत्ननगर नगरपालिकाका नगरप्रमुख प्रलाद सापकोटाले बछौली माविको भौतिक संरचनाको आवश्यकतालाई महावाणिज्य दूतावासको सहयोगले थप टेवा पुग्ने विश्वास व्यक्त गरे । शिक्षा र स्वास्थ्यमा स्थानीय सरकारले लगानी गरे पनि प्रतिफल आइनसकेको बताउँदै रत्ननगर नगरपालिकाले नगरभित्र कक्षा १२ सम्मको शिक्षा निःशुल्क गर्ने घोषणा गरिसकेको जानकारी दिए । उनले बछौली माविमा प्राविधिक शिक्षासमेत सुरू गरेको बताउँदै नयाँ भवन निर्माणबाट शैक्षिक उपलब्धि हासिल गर्न सहयोग पुग्ने बताए । आगामी दिनमा महावाणिज्य दूतावाससँग सहकार्य गर्दै अगाडि जान तयार रहेको उनको भनाइ थियो ।

बछौली माविका प्रधानाध्यापक शिवराम मरहट्ठाले स्वागत मन्तव्य तथा अङ्ग्रेजी शिक्षक बुद्धिसेन चौधरीले सञ्चालन गरेको कार्यक्रममा रत्ननगर–६ का वडाध्यक्ष किरण चौधरी र विद्यालय व्यवस्थापन समितिका अध्यक्ष राममणि खनालले विद्यालय भवन निर्माणमा सहयोग गर्ने भारत सरकार तथा डिपिआर निर्माणदेखि नै सहकार्य गर्ने राजनीतिक दलहरु, नगरप्रमुख तथा कार्यपालिकाहरु र प्रमुख कार्यकारी अधिकृत सुकदेव लम्सालप्रति आभार व्यक्त गरे । कार्यक्रममा वडाध्यक्षहरु, कार्यपालिका सदस्य एवम् विभिन्न संघसंस्थाका प्रतिनिधिहरुको सहभागिता रहेको थियो ।

तीनतले भवन, मञ्च, सरस्वती मन्दिर र शौचालय गरी चारवटा संरचना निर्माणको लागि माँ भवानी ए.एल.एजे जय शम्भु जेभीसँग २०८३ साउन २५ गतेसम्म निर्माण सम्पन्न गर्ने गरी गत फागुन २५ गते भ्याटसहित ३ करोड ४९ लाख ३१ हजार ६८० रुपैयाँ ६६ पैसामा निर्माण सम्झौता भएको रत्ननगर नगरपालिकाका प्राविधिक शाखा प्रमुख निमित्त डिभिजन इन्जिनियर कृष्णप्रसाद उपाध्यायले जानकारी दिए । भवन निर्माणको लागि ८० प्रतिशत भारत सरकारको र २० प्रतिशत रत्ननगर नगरपालिकाको रहने छ ।

भवन निर्माणका लागि नेपाल–भारत विकास सहकार्यअन्तर्गत भारत सरकारको ३ करोड ५० लाख रुपैयाँ, रत्ननगर नगरपालिकाको ४० लाख रुपैयाँ र बछौली माविको ३० लाख रुपैयाँको लागत साझेदारी रहने प्रमुख कार्यकारी अधिकृत सुकदेव लम्सालले जानकारी दिए । सन् २००३ देखि भारत सरकारले नेपालका ५६३ बढी परियोजनामा सहकार्य गर्दै आएको छ । जसमध्ये ४९५ वटा परियोजना सम्पन्न भइसकेका छन् । बागमती प्रदेशमा १०८ परियोजनामध्ये चितवनका १० वटा छन् । यसबाहेक भारत सरकारले नेपालका अस्पताल, स्वास्थ्यचौकी र शैक्षिक संस्थाहरुमा एक हजार ९ एम्बुलेन्स, ३०० स्कुल बस उपहारस्वरुप प्रदान गरिसकेको छ ।

जसमा चितवनमा मात्रै १७ एम्बुलेन्स र ५ स्कुल बस प्रदान गरिएको वाणिज्यदूत तरुण कुमारले जानकारी दिए । सन् १९६२ मा स्थापना भएको बछौली माविमा नर्सरीदेखि कक्षा १२ सम्म पढाइ हुँदै आएको छ । यहाँ ६५० जना विद्यार्थी अध्ययनरत छन् । विद्यालयले सिटिइभिटीसँग सम्बन्धन प्राप्त होटल म्यानेजमेन्टमा डिप्लोमा कोर्ष पनि सञ्चालन गर्दै आएको छ ।

दसैँ बिदापछि सिएमसीमा नियमित ओपीडी सेवा सुरु

दसैँमा सौराहामा आन्तरिक पर्यटकको चहलपहल कम

अर्को साता वर्षाको सम्भावना, अहिल्यै त्रसित नहुन मौसमविद्को आग्रह