नवलपुर । गैँडाकोट–८ मा सञ्चालन भइरहेको ज्ञानकुञ्ज इङ्गलिस बोर्डिङ स्कुल नयाँ शैक्षिक सत्रबाट गैँडाकोट–२ मा रहेको गैँडाकोट इङ्गलिस स्कुल प्रालिको व्यवस्थापनमा सञ्चालन हुने भएको छ । विद्यालयको व्यवस्थापन हस्तान्तरणको विषयमा ज्ञानकुञ्ज बोर्डिङ स्कुलका सञ्चालक धनबहादुर गुरुङ र गैँडाकोट इङ्गलिस स्कूल प्रा.लि. का जनसम्पर्क तथा सञ्चार अधिकृत श्रीहरि चालिसेबीच आज सम्झौतापत्रमा हस्ताक्षर भएको हो ।

शैक्षिक सत्र २०८२ बाट नयाँ व्यवस्थापनमा सञ्चालन हुने ज्ञानकुञ्ज बोर्डिङ स्कुलको २०८१ चैत मसान्तसम्मको लेखा परीक्षणबाट देखिएको सम्पूर्ण हरहिसाब पुरानै व्यवस्थापनको हुने गरी आज सम्झौता गरिएको हो । नयाँ शैक्षिक सत्रबाट ज्ञानकुञ्जको शैक्षिक र विद्यालयको सम्पूर्ण जिम्मेवारी गैँडाकोट इङ्गलिस स्कूल प्रालि को नीति, विधि, निर्णय अनुसार हुने जनाइएको छ ।

ज्ञानकुन्ज इङ्गलिस स्कूलमा कार्यरत शिक्षक कर्मचारीको व्यवस्थापन गैँडाकोट इङ्गलिस स्कूलको पद्धती र नियम अनुसार हुने जनाइएको छ । सम्झौतापछि आफ्ना भनाइ राख्दै गैँडाकोट इङ्गलिस स्कुलका प्राचार्य हीरालाल अर्यालले दुवै विद्यालय यथास्थानमै सञ्चालन हुने जानकारी दिनुभयो । गैँडाकोटमा शिक्षाको स्तर उकास्ने मुख्य उद्देश्यअनुसार ज्ञानकुञ्ज स्कुललाई आफ्नो व्यवस्थापनमा सुरु गरिएको भन्दै प्राचार्य अर्यालले यस महान् कार्यमा सम्पूर्ण अभिभावक, विद्यार्थी, शुभचिन्तक, समाजसेवीको साथ, सहयोग, सल्लाह र सुझावको अपेक्षा गरिएको बताउनुभयो ।

दुवै विद्यालयलाई गैँडाकोटको मात्रै नभइ देशकै उदाहरणीय शैक्षिक संस्थाको रुपमा स्थापना गर्नु आफूहरुको लक्ष्य भएको अर्यालको भनाइ छ । सम्झौतापत्र हस्ताक्षर कार्यक्रममा ज्ञानकुञ्ज इङ्लिस बोर्डिङ स्कुलका सञ्चालक धन बहादुर गुरुङलले आफूहरुले माध्यमिक शिक्षा परीक्षामा सत प्रतिशत विद्यार्थीहरु उत्तीर्ण गराउँदै आएको तथा दुवै विद्यालयको सिद्धान्त र उद्देश्य मिलेकोले विद्यालयको शैक्षिक गुणस्तर अझ वृद्धि गरी देशमै नमूना शिक्षा प्रदान गर्ने उद्देश्य रहेको बताउनुभयो ।

एउटै व्यवस्थापनमा दुवै विद्यालय सञ्चालन हुँदा विद्यार्थी र अभिभावकलाई अझ धेरै अवसर प्राप्त हुने गुरुङले विश्वास गर्नुभयो । कक्षा १० सम्म पठनपाठन हुँदै आएको ज्ञानकुञ्ज इङ्गलिस बोर्डिङ स्कुलमा दुई सय ५० जना विद्यार्थीहरु अध्ययनरत छन् । कक्षा १२ सम्म पढाइ सञ्चालन हुदै आएको गैँडाकोट इङ्गलिस स्कुलमा एक हजार तीन सय ५० जना विद्यार्थीहरु अध्ययनरत छन् ।

गैँडाकोट इङ्गलिस स्कुल गैँडाकोट नगरपालिकाकै एकमात्रै ‘क’ वर्गको विद्यालय हो । विद्यालयले विद्यार्थीहरुको मनोविज्ञानमा आधारित रहेर गुणस्तरीय शिक्षा प्रदान गर्दै आएको छ ।

दसैँ बिदापछि सिएमसीमा नियमित ओपीडी सेवा सुरु

दसैँमा सौराहामा आन्तरिक पर्यटकको चहलपहल कम

अर्को साता वर्षाको सम्भावना, अहिल्यै त्रसित नहुन मौसमविद्को आग्रह