नवलपुर । भूमि समस्या समाधान आयोग नवलपुरले भूमिहीन दलित, भूमिहीन सुकुमबासीलाई जग्गाको लालपुर्जा उपलब्ध गराउने तयारीसहित काम सुरु गरेको छ । आयोगले आइतबार नवलपरासी (बर्दघाट–सुस्तापूर्व)को गैँडाकोट नगरपालिका वडा नम्बर ३ केलादीबाट भूमिहीनलाई जग्गा उपलब्ध गराउने तयारीसहित नापजाँचको काम सुरु गरेको हो ।
कार्यक्रममा गैँडाकोट नगरपालिका प्रमुख मदनभक्त अधिकारीले चुनावको बेलामा सुकुमबासी, दलित भूमिहीनहरुप्रति गरेको प्रतिबद्धता अनुसार काम गर्न सुरु गरेको बताउनुभयो । लामो समयदेखि जमिन कुरेर बसेका व्यक्तिलाई जग्गाको मालिक बनाउने कामको प्रकृया सुरु भएको भन्दै नगरप्रमुख अधिकारीले अब पुर्जा पाउनेमा ढुक्क हुन आग्रह गर्नुभयो । सरकार तलमाथि नभए तथा कानुनले नरोकेको अवस्थामा आगामी भदौसम्म लालपुर्जा वितरण गरिने उहाँको भनाइ छ । जग्गा नापजाँचका क्रममा भूमि समस्या समाधान आयोग नवलपुरका अध्यक्ष तारापति खरेलले यसअघि अस्थिरताको कारण आयोगले काम पूरा गर्न नसकेका बताउनुभयो ।
अहिले नापजाँच सुरु भएको केलादीमा जङ्गल रहेको भए पनि २०७६ को कानुनले १० वर्ष बसोबास भएको तर रुख नभएको जमिन भूमिहीन दलित, भूमिहीन सुकुमबासी तथा अव्यवस्थित बसोबासीलाई दिन सकिने भनेको कारण जग्गा नापजाँच सुरु गरिएको बताउनुभयो । जग्गाको पुर्जा वितरणका लागि नौ वटा चरणहरु पार गर्नुपर्ने भन्दै अध्यक्ष खरेलले अहिले सुरु भएको जग्गा नापजाँचको चरण चौथो भएको बताउनुभयो । गैँडाकोट नगरापलिकाका प्रवक्ता एवम् वडा नम्बर ३ का वडाध्यक्ष शिवकान्त तिवारीले स्थानीय तहको पहिलो निर्वाचन २०७४ मा निर्वाचित भएर आउँदा यही केलादीबाट विद्युतीकरण सुरु गरेर पूरा गरेकोमा अहिले लालपुर्जाको काम पनि यहाँबाट सुरु भएको र पूरा हुने बताउनुभयो ।
विवाद रहित तरिकाले काम गरेर चाँडो लालपुर्जा वितरण गर्ने तयारीमा आफूहरु रहेको उहाँको भनाइ छ । गैँडाकोट नगरपालिकाको भूमि तथा जग्गा प्रशासन शाखा प्रमुख विष्णुराज गौतमले नगरस्तरीय सहजीकरण समिति निर्माण गरी कार्ययोजना बनाएर जग्गाको नापजाँचको काम सुरु गरेको बताउनुभयो । अबको दिनमा कार्ययोजनाअनुसार अगाडि बढिने गौतमले बताउनुभयो । काम छिटो र सहज तरिकाले गर्न फिल्डको कामसँगै कागजपत्र तयार पार्ने कामसमेत सँगसँगै लैजाने उहाँको भनाइ छ ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.