काठमाण्डौ । अबको स्थायी कमिटी वैठकमा आफूले प्रस्तुत गर्ने प्रस्ताव तयार गर्न आफ्ना प्रमुख सल्लाहकार विष्णु रिमाल र लुम्बिनी प्रदेशका मुख्यमन्त्री शंकर पोख्रेललाई खटाएका नेकपा अध्यक्ष तथा प्रधानमन्त्री केपी शर्मा ओलीले वैठकपछि के गर्ने भन्ने रणनीति तयार गर्न थालेका छन् । पार्टी विभाजन हुने कुरामा ओली मात्र होइन, प्रचण्ड माधव नेपाल पक्ष पनि विश्वस्त छैन, तर एक अर्काेलाई जसरी पनि तह लगाएर पार्टीलाई आफू अनुकूल संचालन गर्नको लागि अपनाउने हतकण्डाको बारेमा दुवै पक्षले गंभिररुपमा तयार गरिरहेको छ । प्रधानमन्त्री ओली भने सधैभरिको किचकिच भन्दा अबको वैठकपछि जस्तोसुकै भए पनि वारपार हुनुपर्छ भन्ने सोंचाईमा पुगेको उनी निकटका नेताहरु बताउंछन् । रिमाल र पोख्रेलले वैठकमा ओलीको तर्फबाट प्रस्तुत हुने प्रस्ताव तयार गर्ने क्रममा दिनहुं जसो नै ओलीलाई भेटिरहेका छन् भने ओलीले पनि आफू निकट मात्रै आफ्नो विपक्षी खेमाका नेताहरुलाई पनि दिनहुं भेटिरहेका छन् । उनी एकातिर आफ्नो पक्षका नेताहरुलाई स्थायी कमिटीको वैठकपछि के गर्ने भन्ने बारेमा रणनीति बनाउन लगाइरहेका छन् भने प्रचण्ड, माधव खेमाका नेताहरुलाई जसरी पनि आफ्नो पक्षमा पार्ने रणनीतिमा लागेका छन् । त्यसको लागि उनी आफैले दिनहुं विभिन्न नेताहरु भेटिरहेका छन् । स्रोतका अनुसार प्रचण्ड माधव नेपाल खेमाका धेरै नेताहरु अहिले मौन वस्नुमा पनि ओलीको सक्रियता नै मुख्य कारण हो । ‘उहांले अहिले मबाट मात्रै होइन प्रचण्ड, माधव, वामदेव, झलनाथ कसैबाट पनि पार्टी चल्दैन । तपाईहरु अगाडि सर्नुस्, म सहयोग गर्छु भनिरहनु भएको छ । त्यसले मजस्ता धेरै युवा नेताहरुलाई अलिकति उत्साहित बनाउनु स्वभाविक हो’ माधव नेपाल पक्षका एक नेताले जनतापाटीसंग भने । ओलीले एकातर्फ युवा नेताहरुलाई प्रभावमा पारेर प्रचण्ड-माधव नेपाललाई दवाव रणनीति लिएका छन् भने अर्काेतर्फ सभापति शेरबहादुर देउवा लगायतका नेपाली कांग्रेसका नेताहरुसंग भेटेर ‘आवश्यक पर्यो भने पार्टी विभाजन गरेर कांग्रेससहितको सरकार बनाउन पनि तयार छु’ भन्ने सन्देश पनि दिइरहेका छन् । यद्धपी ओली स्वंय अहिले नै पार्टी विभाजन गरिहाल्ने तयारीमा नरहेको र विपक्षी खेमालाई तर्साउनको लागि ‘कांग्रेस कार्ड’ प्रयोग गरिरहेको उनी पक्षका नेताहरु बताउंछन् ।

सचिवालय विघटन नभए विस्तार गर्ने तयारी
ओली पार्टीको हाइकमाण्डको रुपमा रहेको सचिवालयबाट हैरान छन् । नौ सदस्यिय सचिवालयमा ओली पक्ष अल्पमतमा छ । त्यहीकारण सचिवालयबाट निरन्तर अवरोध खेपिरहेका ओली त्यसलाई विघटन गर्ने र त्यो संभव नभए विस्तार गरेर १५ सदस्यीय बनाउने प्रस्ताव गर्ने भएका छन् । केही दिन अघि महासचिव विष्णु पौडेल सचिवालय समस्या सृजना गर्ने थलो बनेको भन्दै विघटन गर्नु पर्ने धारणा सार्वजनिकरुपमै व्यक्त गरेका थिए । उनले ओलीसंग छलफल गरेर नै त्यसो बोलेका थिए । सचिवालय विघटन हुने स्थिति नभएमा ६ जना थप गर्ने र त्यसमा धेरै जसो आफ्नो पक्षका नेताहरुलाई ल्याउने उनको तयारी छ । त्यसो भएमा जनार्दन शर्मा, घनश्याम भुषाल, योगेश भट्राई, शंकर पोख्रेल, प्रदिप ज्ञवाली समेतलाई सचिवालयमा समेट्न सकिने ओली पक्षको विश्लेषण छ । शर्मा प्रचण्ड पक्षधर तथा भुषाल र भट्राई माधव नेपाल पक्षधर भए पनि पछिल्लो विवादमा समन्वयकारी भूमिका खेलेकोले ओली उनीहरुप्रति नरम बनेका हुन् ।