नेपाल कम्युनिष्ट पार्टी (एकीकृत समाजवादी) केन्द्रीय कमिटीको तेस्रो पूर्ण बैठक पार्टी अध्यक्ष कमरेड माधव कुमार नेपालको अध्यक्षतामा यहि मिति २०८२ कार्तिक १२ देखि १४ गते सम्म काठमाडौंमा सम्पन्न भयो । बैठकले निम्न महत्वपूर्ण निर्णयहरु गरेको छ :-

पार्टीको मार्गदर्शक सिद्धान्त मार्क्सवाद लेनिनवाद हुने, रणनैतिक लक्ष्य वैज्ञानिक समाजवाद हुने, नेपाली विशेषताको समाजवादी कार्यक्रम र कार्यदिशा अँगाल्ने, सङ्गठनात्मक सिद्धान्त जनवादी केन्द्रीयता हुने, जनवादी क्रान्तिका उपलब्धी तथा राष्ट्रिय स्वाधिनताको रक्षा र सुशासन एवम सामाजिक न्याय सहित आर्थिक-सामाजिक रुपान्तरण गर्दै समाजवादतर्फ अघि बढ्ने कार्यनीति लिने सहमतिका साथ हाम्रो पार्टी नेकपा (एकिकृत समाजवादी), नेकपा (माओवादी केन्द्र), विप्लब समूहबाट विद्रोह गरेर पुनर्गठन भएको नेकपा, नेपाल समाजवादी पार्टी, नेकपा ( समाजवादी), जनसमाजवादी लगायतका पार्टीसंग पार्टी एकता गर्ने निर्णय गरेको छ ।

एकतामा धेरै भन्दा धेरै समुहलाई समेटेर लैजाने निर्णय भएको छ । त्यसैले यो एकता नेपालको कम्युनिष्ट आन्दोलनलाई एकताबद्ध गर्ने एक कोशेढुङ्गा सावित हनेछ । हाम्रो यस ऐतिहासिक निर्णयबाट अत्तालिएर के.पी ओलीले घरफर्क’ भन्ने भ्रम जाल फ्याकेका छन् । हाम्रो विचको एकता प्रक्रियालाई भाड्ने उनको यो उनको दुष्प्रयास मात्र हो । यसबाट कोही पनि भ्रमित नहुन र सिङ्गो पार्टी पङ्क्तिलाई केन्द्रीय कमिटीको निर्णयको पक्षमा दृढतापूर्वक उभिन पार्टी हार्दिक आहान गर्दछ ।