चितवन । आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै स्थानीय प्रशासनले अनुमति लिएर राखिएका हतियार फिर्ता गर्न आह्वान गरे पनि चितवनमा हालसम्म ११ वटा हतियार मात्रै प्रशासनलाई बुझाइएको छ। जिल्लामा हतियार राख्ने अनुमति पाएका व्यक्तिको संख्या धेरै भए पनि अपेक्षित रूपमा हतियार फिर्ता नआएकाले प्रशासनको ध्यानाकर्षण भएको छ।

चितवनका प्रमुख जिल्ला अधिकारी गणेश अर्यालका अनुसार जिल्लामा हाल १४१ जनाले विभिन्न प्रकारका हतियार राख्न कानुनी अनुमति लिएका छन्। निर्वाचनलाई निष्पक्ष, स्वच्छ, शान्तिपूर्ण तथा विश्वसनीय बनाउन स्थानीय प्रशासनले गत माघ ६ गते सूचना प्रकाशित गर्दै अनुमति लिएर राखिएका सम्पूर्ण हतियार १५ दिनभित्र सम्बन्धित प्रशासन कार्यालयमा बुझाउन आग्रह गरेको थियो। तर तोकिएको समयावधि सकिँदासमेत सबै हतियार फिर्ता नभएको उहाँले जानकारी दिनुभयो।

प्रजिअ अर्यालका अनुसार हालसम्म प्राप्त विवरणअनुसार केही हतियार जिल्ला बाहिर राखिएका हुन सक्ने सम्भावना रहेको छ। “कतिपय व्यक्तिले आफ्नो हतियार अन्य जिल्लामा बुझाएको हुन सक्छन्, त्यसको तथ्याङ्क आउने क्रम जारी छ,” उहाँले भन्नुभयो। यसका साथै बैंक तथा वित्तीय संस्थाको सुरक्षामा प्रयोग हुने हतियार भने फिर्ता गर्न नपर्ने व्यवस्था रहेको पनि उहाँले स्पष्ट पार्नुभयो। बैंकिङ क्षेत्रमा प्रयोग हुने हतियार सुरक्षा प्रयोजनका लागि अनिवार्य भएकाले ती हतियार निर्वाचन अवधिमा पनि प्रयोगमा रहनेछन्।

अन्य सर्वसाधारण व्यक्तिले अनुमति लिएर राखेका हतियार भने निर्वाचन अवधिभर प्रशासनमा बुझाउनुपर्ने व्यवस्था गरिएको छ। निर्वाचन सम्पन्न भएपछि कानुनी प्रक्रिया पूरा गरी पुनः हतियार फिर्ता लिन सकिने व्यवस्था मिलाइएको प्रशासनले जनाएको छ। यस कदमले निर्वाचनको समयमा कुनै पनि किसिमको अवाञ्छित गतिविधि रोक्न सहयोग पुग्ने विश्वास गरिएको छ।

स्थानीय प्रशासनले बाँकी हतियारधनीलाई समयमै हतियार बुझाउन पुनः आग्रह गरेको छ। निर्वाचनलाई शान्तिपूर्ण रूपमा सम्पन्न गराउन सबै सरोकारवाला पक्षको सहयोग आवश्यक रहेको उल्लेख गर्दै प्रशासनले नियमको पालना गर्न सबैलाई अनुरोध गरेको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै