गैँडाकोट । गैँडाकोटमा अनुगमन गरिएका पसल मध्ये धेरैजसोमा म्याद गुज्रेका खाद्य सामाग्री भेटिएको छ । यस्ता खाद्य सामाग्रीलाई अनुगमन टोलीले जफत गर्नुका साथै नष्ट गरेको छ । घरेलु तथा साना उद्योग कार्यालय नवलपुरको अगुवाईमा गैंडाकोटका विभिन्न क्षेत्रमा किराना पसल, खाद्य पसल, होटल तथा रेष्टुरेन्टको अनुगमन गरिएको थियो ।

अनुगमनका क्रममा किराना पसलमा म्याद नाघेका खाद्य बस्तु भेटिएको, होटलमा सरसफाई नभएको पाइएको घरेलु तथा साना उद्योग कार्यालय नवलपुरका प्रमुख सागर खनालले बताउनुभयो । उहाँले मुल्यसुचि नराख्ने, दर्ता प्रक्रियामा नजाने व्यवसायिहरु रहेकाले उनिहरुलाई सचेत बनाएको पनि बताउनुभयो । साथै उहाँले अब त्रैमासिक रुपमा घरेलु कार्यालयले अनुगमन गर्ने प्रतिबद्धता जनाउनुभएको छ ।

चाडपर्व लागेसँगै मूल्यबृद्धि हुने, म्याद नाघेका बस्तु क्रयबिक्रय हुने गरेको उपभोक्ताको गुनासो आएसँगै अनुगमन प्रक्रिया अघि बढाईएको उहाँको भनाई थियो । अनुगमन कार्यक्रममा घरेलु तथा साना उद्योग कार्यालय नवलपुरका प्रमुख सागर खनाल, जिल्ला प्रशासन कार्यालय नवलपुरका खरिदार कुश्माखर सापकोटा, उद्योग बाणिज्य संघ गैंडाकोट नवलपुरका प्रतिनिधि राजेन्द्र गौतम, उपभोक्ता हित संरक्षण समितिका प्रतिनिधि डोरमान गिरी, गैँडाकोट नगरपालिकाका प्रशासकिय अधिकृत लिलाधर पौडेल, खाद्य तथा गुण नियन्त्रण कार्यालय नवलपुरका खाद्य निरिक्षक बन्दना पन्त लगायतको टोलिले अनुगमन गरेको थियो ।

टोलीले गैँडाकोटको थुम्सी, कालिका चोक, भृकुटि चोक, विजय चोक, कांग्रेस चोक लगायतका स्थानमा रहेका पसल तथा होटलहरुमा अनुगमन गरेको थियो ।

अर्को साता वर्षाको सम्भावना, अहिल्यै त्रसित नहुन मौसमविद्को आग्रह

तिब्बतमा ७ म्याग्निच्युडको भूकम्प, १६ जनाको मृत्यु

आगामी तीन दिन देशका अधिकांश स्थानमा मौसम सफा रहने