काठमाडौं । बैंक तथा वित्तीय संस्थाहरूको शाखा विस्तारसँगै वित्तीय पहुँच बढेपछि कर्णाली प्रदेशमा वित्तीय कारोबार बढ्दै गएको छ । नेपाल राष्ट्र बैंकले बुधबार सार्वजनिक गरेको प्रादेशिक आर्थिक गतिविधि अध्ययनमा कर्णाली प्रदेशभित्र निक्षेप संकलन र कर्जा लगानी उच्च दरमा वृद्धि भएको भेटिएको छ ।
आर्थिक वर्ष २०७७र७८ को असार मसान्तसम्ममा कर्णाली प्रदेशमा बैंक तथा वित्तीय संस्थाहरूले संकलन गरेको निक्षेप ३५ दशमलव ९१ प्रतिशतले वृद्धि भई ५७ अर्ब २२ करोड ११ लाख रुपैयाँ पुगेको छ । अघिल्लो वर्ष सोही अवधिमा यस्तो निक्षेप ३३ दशमलव ८४ प्रतिशतले वृद्धि भई ४२ अर्ब १० करोड २६ लाख पुगेको थियो ।
प्रदेशमा बढेको रेमिट्यान्स आप्रवाह, बैंकिङ्ग सेवामा आएको विस्तार तथा सर्वसाधारणको बचत गर्ने बानीमा आएको विकासले कुल निक्षेपमा वृद्धि भएको प्रतिवदनले औल्याएको छ ।
यसैगरी अघिल्लो आर्थिक वर्षको तुलनामा कर्णाली प्रदेशमा कर्जा प्रवाह पनि ४१ दशमलव २२ प्रतिशतले बढेर ५१ अर्ब ३३ करोड १८ लाख पुगेको छ । अघिल्लो वर्षको सोही अवधिमा यस्तो कर्जा २२ दशमलव २४ प्रतिशतले बढेर ३६ अर्ब ३४ करोड ९२ लाख पुगेको थियो ।
कोरोना संक्रमणको प्रभाव न्यून भए पनि अर्थतन्त्र चलायमान हुँदै गएकोले कर्जा विस्तारमा वृद्धि भएको र सर्वसाधारणको वित्तीय पहुँचमा भएको वृद्धि, सहुलियतपूर्ण कर्जा र पुनर्कर्जा सुविधा तथा मौद्रिक नीतिले प्रदान गरेका अन्य विभिन्न छुट तथा सुविधाहरुले पनि कर्जा विस्तार भएको राष्ट्र बैंकले जनाएको छ ।
कर्णाली प्रदेशमा बैंक तथा वित्तीय संस्थाका ४१२ शाखा रहेका छन् । त्यसमध्ये वाणिज्य बैंकका १९२, विकास बैंकका १७, वित्त कम्पनीका तीन र लघु वित्त वित्तीय संस्थाका २०० शाखा रहेको प्रतिवेदनमा उल्लेख छ ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.