चितवन । दुई वर्षभित्र निर्माण सम्पन्न गर्नुपर्ने देवघाटस्थित विद्युतीय शवदाह गृहको काम तीन वर्षमा १५ प्रतिशत मात्रै भएको छ । शवदाह गृहको निर्माण सम्झौता अवधि ३ माघ २०७७ मै सकिएको हो । त्यतिबेला भौतिक प्रगति १० प्रतिशत थियो । त्यसयता हालसम्म शवदाह गृहको भौतिक प्रगति १५ प्रतिशत मात्रै पुगेको छ ।
शवदाह निर्माण गर्ने जिम्मा पाएको मिलिनियम सिद्धगढी जेभीले कहिले कोरोना महामारी त कहिले बाढीले क्षति पुर्याएको भनी समय माग्यो । सरकारी निकाय सघन सहरी तथा भवन निर्माण आयोजना चितवनले पनि उसले मागेअनुसार म्याद थप गर्दै गयो । आयोजनाले दिएको अन्तिम म्याद आगामी चैतमा सकिँदै छ ।
तर चैतसम्ममा पनि शवदाह गृह निर्माण सम्पन्न हुनेमा आयोजना प्रमुख नै विश्वस्त छैनन् । एक महिनाभित्र कामको प्रगति सन्तोषजनक नभए ठेक्का तोड्ने तयारी भएको सघन सहरी तथा भवन निर्माण आयोजना चितवनका प्रमुख प्रकाश अर्यालले बताए ।
‘छिटो काम सक्नलाई हामीले दबाब र ताकेता गरिरहेका छौँ । एक महिनाभित्रको कामको प्रगति सन्तोषजनक नभए ठेक्का तोड्छौँ’, उनले भने । दैनिक ३० जनाभन्दा बढी कामदार खटाएर एक महिनाभित्र स्ल्याब ढलानको तयारी नगरे काम सन्तोषजनक नमानिने उनले बताए । अहिलै ठेकेदारले दैनिक १३ जना मात्रै कामदार फिल्डमा खटाएको छ ।
शवदाह गृहको टाइविमको काम सकेर पिलरको काम सुरु भएको छ । ठेकेदारले गएको जेठमा शवदाह गृहको जग खनेको थियो । जग खनेर सोलिङ गरेपछि बाढीले पुर्यो । बर्खामा बाढी आउँछ भन्ने थाहा पाउँदापाउँदै पनि ठेकेदारको आफ्नै ढिलासुस्तीले गर्दा बाढी पसेको अर्याल बताउँछन् ।
शवदाह गृह निर्माणमा चरम ढिलासुस्ती भएपछि सहरी विकास तथा भवन निर्माण विभागले गएको मंसिरमा आयोजनालाई स्पष्टीकरण सोधेको थियो ।
शवदाह गृहको निर्माण सुरु भएपछि कोभिड-१९ को पहिलो र दोस्रो लहरका कारण कामदार फिल्डसम्म जान नसकेको, बाढीले रिटेनिङ वालमा क्षति पुर्याएको र निर्माण व्यवसायीले समयमै जगको काम गर्न नसक्दा बाढीले क्षति पुर्याएको भनी आयोजनाले जवाफ दिएको थियो ।
ठेकेदारले लग्यो दुईपटकको भुक्तानी
शवदाह गृह निर्माणमा ढिलासुस्ती गर्दै आएको ठेकेदार कम्पनीले दुईपटक भुक्तानी लिइसकेको छ । दुईपटकमा डेढ करोड रुपैयाँ लगिसकेको आयोजना प्रमुख अर्यालले बताए । पेस्कीसमेत गर्दा ठेकेदारले दुई करोडभन्दा बढी रकम लगिसकेको छ ।
दुई वर्षभित्र शवदाह गृह निर्माण सम्पन्न गर्नेगरी ११ करोड २१ लाख आठ हजार ६४१ रुपैयाँमा ठेकेदारसँग सम्झौता भएको थियो । बाढीले क्षति पुर्याएपछि गएको असारदेखि मात्रै ठेकेदारले काम थालेको उनले बताए ।
पवित्र धार्मिकस्थल देवघाटमा चार कठ्ठा जमिनमा विद्युतिय शवदाह गृह बनाउन लागिएको हो । देवघाटमा दैनिक औसत १२ जनाको शव दाहसंस्कार गर्ने गरिएको छ । शवदाह गृह निर्माण भएपछि शव जलाउन छिटो र सहज हुने अपेक्षा गरिएको छ ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.