चितवन । पूर्वी चितवनको खगेरी खोलामा भरतपुर र कालिका जोड्ने गरी मोटरेबल पुल बन्ने भएको छ । कुल ७० मिटर लम्बाइ र फुटपाथसहित ११ मिटर चौडाइको पुल बन्न लागेको पूर्वाधार विकास कार्यालयले जनाएको छ । पुल निर्माणका लागि सामान झार्ने काम भइरहेको कार्यालयकी इन्जिनियर पूजा ढकालले जानकारी दिइन् ।
उनका अनुसार लामा गौरीशङ्कर हिमालय कन्स्ट्रक्सन काठमाडौँले पुल निर्माणको जिम्मा पाएको छ । कुल ७० मिटर लम्बाइ र ११ मिटर चौडाइको पुलमा मोटर गुड्ने भाग ७.५ मिटर र बाँकी पैदल हिँड्न मिल्ने गरी फुटपाथ बनाइने उनले बताइन् । १८ महिनामा निर्माण सम्पन्न गर्ने गरी बागमती प्रदेश सरकारको मूल्य अभिवृद्धि करसहित कुल १० करोड ९७ लाख ८८ हजार १२५ रूपैयाँ बजेटमा उक्त पुल बन्न लागेको उनले बताइन् । पुल निर्माणका लागि बागमती प्रदेश सरकारले उक्त बजेट विनियोजन गरेको हो ।
पुल निर्माणका लागि निर्माण कम्पनीसँग गत असार २० गते नै सम्झौता भएको थियो । भरतपुर महानगरपालिकाको वडा नं–११ को लामाटोलदेखि कालिका नगरपालिकाको वडा नं–५, पदमपुर जोड्ने गरी पुल बन्न लागेको हो । निर्माण सामग्री झार्ने काम भइरहेको हुँदा अबको करिब हप्ता÷दस दिनमा निर्माण कार्य सुरू हुने इन्जिनियर ढकालको भनाइ छ । भरतपुरको भोजाडदेखि पदमपुर जाने बाटोमा रहेको खगेरी खोलाको पुलभन्दा करिब दुई किलोमिटर उत्तरतर्फ पर्ने सोही खोलाको कमिनीघाट भन्ने ठाउँमा अर्को पुल बनेपछि कालिका नगरपालिकाको उत्तरी बस्तीका बासिन्दालाई भरतपुर आउने बाटो छोटिने स्थानीयको भनाइ छ ।
‘कमिनीघाटमा पुल नहुँदा हामीलाई भरतपुर जान धेरै बाटो घुम्नुपथ्र्यो’, कालिका–५ का काशिराम महतोले भने, ‘पुल बनेपछि बाटो छोटो हुनुका साथै बजारसम्म पुग्न धेरै सहज हुने भयो ।’ पदमपुरवासीले भरतपुरसम्म आउनका लागि वर्षौंदेखि कमिनीघाटकै बाटो प्रयोग गर्दै आएका छन् । तर, खगेरीमा पुल नहुँदा वर्षात्को समयमा भने यो बाटो ठप्प हुने उनले बताए । पदमपुर तरकारी र केरासहित खेतीपातीका लागि यसै पनि उर्वरभूमि मानिन्छ ।
आफूलाई पायक पर्ने स्थानमा पुल बन्ने भएपछि पदमपुर क्षेत्रको विकासमा अझ सहज हुने उनको भनाइ छ । कमिनीघाट भरतपुर–११ को लामाटोलबाट करिब दुई किलोमिटर पूर्वमा पर्छ । यहाँ पुल निर्माण भएपछि भरतपुर–११ र कालिका–५ को दूरी पनि नजिक हुने भरतपुर–११ का वडा अध्यक्ष बाबुराम अधिकारी बताउँछन् ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.