चितवन  । नेपाली कांग्रेसका प्रवक्ता डा. प्रकाशशरण महतले एमसिसि र सत्ता गठनबन्धन फरक विषय भएको बताउनु भएको छ । नेपाल प्रेस युनियन चितवन शाखाले आज यहाँ आयोजना गरेको पत्रकार सम्मेलनमा बोल्दै उहाँले कांग्रेसले गठबन्धन टुट्नु पर्छ भनेको छैन, एमसिसि सदनमा लगेर छलफल गरौं भनेको बताउनुभएको हो । उहाँले सत्ता गठबन्धन र एमसिसि फरक विषय भएकाले एमसिसिका कारण गठबन्धनमा समस्या नहुनेमा कांग्रेस विश्वस्त रहेको बताउनुभयो ।

उहाँले अगाडि भन्नुभयो “गठवन्धनको बिषय एउटा हो एमसीसीको अर्को बिषय हो ।” एमसिसिमा कुनै देशद्रोह नभएको उहाँले बताउनुभयो । महतले एमसिसि नेपालको हितमा रहेको बताउँदै भन्नुभयो “नेपालको सडक, विद्युत ट्रान्समिसन लाईन वन्छ त्यो देश द्रोह हो ?” उहाँले अगाडि भन्नुभयो “संसदमा पेश गरौं, कमिकमजोरी भए आउँछन् । किन हिचकिचाहट भएको छ ?” सभामुखले कुनै पनि विषयलाई रोकेर राख्ने अधिकार नभएको भन्दै उहाँले सार्बभौम संसदको अधिकार हो भन्नुभयो ।

दलहरुको स्पष्ट धारणा आउनु पर्ने भन्दै उहाँले भन्नुभयो “संसदमा एमसिसिका पक्षमा भोट हाल्ने हो की नहाल्ने, बाहिर बस्ने हो की, भित्र बस्ने ? निर्णय गर्नु प¥यो ।” बाहिर हल्ला गरिए जस्तो नरहेको भन्दै उहाँले भन्नुभयो “नेपाली जनतालाई जुन भ्रमको खेती गरिएको छ यो गलत भएको छ । नेपाली जनतालाई पूर्ण रुपमा जे यथार्थ हो त्यो जान्ने हक छ ।

” माओवादी केन्द्रका अध्यक्ष पुष्पकमल दाहाल ‘प्रचण्ड’ ले एमसिसि पास गर्छु भनेर पत्र पठाएको स्मरण गराउँदै उहाँले भन्नुभयो “प्रचण्डले एमसिसि पास गर्छाैं भने सिग्नेचर गरेका हैनन् र ?” विगतमा केपि शर्मा ओली प्रधानमन्त्री हुँदा पनि एमसिसि संसदमा लैजान खोजिएको स्मरण गराउँदै महतले अहिले सत्ता बाहिर पुगेपछि कुरा नफेर्न एमालेसँग आग्रह गनुभयो । उहाँले भन्नुभयो “आज एउटा कुरा भोलि अर्काे कुरा । आज ठिक भोलि बेठिक । सत्तामा हुँदा ठिक नहुँदा बेठिक यस्तो पनि कुरा हुन्छ ?”

दसैँ बिदापछि सिएमसीमा नियमित ओपीडी सेवा सुरु

दसैँमा सौराहामा आन्तरिक पर्यटकको चहलपहल कम

अर्को साता वर्षाको सम्भावना, अहिल्यै त्रसित नहुन मौसमविद्को आग्रह