चितवन । दैनिक १५ सय बढी बिरामी आउने भरतपुर अस्पतालको मेडिकल वार्डमा २४ घण्टादेखि बिरामीले चिकित्सक भेट्न पाएका छैनन् । शनिबार बिहानदेखि आईतबार बिहानसम्म चिकित्सक नआएका हुन् ।अस्पतालको पुरुष मेडिकल वार्डको १४ नम्बर बेडमा रहनु भएका ५५ वर्षिय श्याम सार्कीले २४ घण्टासम्म स्वास्थ्य परीक्षण गर्न चिकित्सक नआएको गुनासो गर्नुभयो । सोही वार्डमा उहाँ जस्तै १६ जना बिरामी हुनुहुन्छ । त्यसो त महिला मेडिकल वार्डमा रहेका २४ जनाले पनि शनिबार बिहानदेखि चिकित्सक भेट्न पाएका छैनन् ।

आईतबार बिहान वार्डमा पुग्दा सबै बिरामी चिकित्सकको पर्खाईमा हुनुहन्थ्यो । माथिल्लो तलाको क्याबिनमा रहेका बिरामीले पनि शनिबार बिहानैदेखि चिकित्सक भेट्न पाएका छैनन् । त्यसो त क्याबिनका नर्ससँग चिकित्सकको रोष्र्टर समेत छैन ।बृद्धबृद्धा वार्डमा १० जना बिरामी पनि चिकित्सक आउँलान र परीक्षण गर्लान भन्ने पर्खाईमा थिए । आक्कल झुक्क आउने मेडिकल अफिसर र आवासीय चिकित्सकको भरमा बिरामीलाई औषधि दिने गरेको डियूटिमा रहेका नर्सहरुले बताए ।

नर्सहरुले दिएको जानकारी अनुसार शनिबार साँझको पालो डा.ऋतुराज तिवारीको हो । बिहान राउण्ड गरेपछि आज बिहानसम्म उहाँ नआउनु भएको उनीहरुको भनाई छ ।बिरामीका कुरुवा भन्दै थिए “कम्तीमा डाक्टरले हेरिदिएको भए, मन सन्तोष हुन्थ्यो ।” त्यसो त चिकित्सकले बिरामी हेरेपछि आधा निको त्यसै हुने उनीहरुको बुझाई छ । शनिबार दिउँसो भर्ना भएका बिरामीले आज बिहानसम्म चिकित्सक भेट्न पाएका छैनन् । धेरै बिरामी रहने अस्पतालका २० क्याविन भरिभराउ छन् ।

मेडिकल वार्डका सबै बेडहरु बिरामीले भरिएका छन् । आफ्नो डियूटिमा नजानु भएका डा. तिवारीले भन्नुभयो “गल्ती भयो, अब म त्यस्तो गल्ती गर्दिन ।” यस अघि पनि समय समयमा तिवारी राउण्डमा नआउने गरेको नर्सहरुको गुनासो छ ।अस्पतालका प्रमुख सुपरिटेण्डेण्ट प्रा.डा.कृष्णप्रसाद पौडेलले राउण्डमा नजाने चिकित्सकलाई कारवाही गरिने बताउनुभयो । उहाँले भन्नुभयो “तालिका अनुसार आफ्नो जिम्मेवारी पूरा नगर्ने चिकित्सकलाई तत्काल कारवाही हुन्छ ।” भरतपुर अस्पताल संघीय अस्पताल हो ।

यहाँ चितवनसहित २१ जिल्लाबाट बिरामी उपचारका लागि आउने गर्दछन् । पछिल्ला दिनहरुमा अस्पताल सुधार उन्मुख भए पनि केही चिकित्सकका अटेरीका कारण बिरामीले दुःख पाउने गरेका छन् । रात्रीकालिन समयमा डियुटि पर्ने प्राविधिक कर्मचारीहरुले पनि आफ्नो पालोमा काम नगर्ने गरेको समय समयमा गुनासो आउने गरेको छ । चितवनका प्रमुख जिल्ला अधिकारी आस्मान तामाङले गुनासो आएपछि अस्पताल प्रशासनसँग बुझेको बताउनुभयो ।

उहाँले आफ्नो कर्तव्य पूरा नगर्ने जुनसुकै चिकित्सक वा कर्मचारीलाई कारवाही गरिने बताउनुभयो । उहाँले अस्पताल विकास समितिको कर्मचारी भए समितिले र निजामतीको भए प्रशासन मार्फत् कारवाहीका लागि सिफारिस गरिने बताउनुभयो ।६०० शैयाको भरतपुर अस्पतालमा दैनिक १५ सयभन्दा बढी बिरामी बहिरंग (ओपिडी) मा आउने गर्दछन् भने अस्पतालका शैयाहरु प्रायः भरिभराउ हुने गर्दछन् । कान्तिपुरहेल्थबाट

दसैँ बिदापछि सिएमसीमा नियमित ओपीडी सेवा सुरु

दसैँमा सौराहामा आन्तरिक पर्यटकको चहलपहल कम

अर्को साता वर्षाको सम्भावना, अहिल्यै त्रसित नहुन मौसमविद्को आग्रह