सो अवसरमा पूर्वराष्ट्रपति डा यादवले राससको समाचार सङ्कलन, समाचार सम्पादन, अङ्ग्रेजी सम्पादनलगायत कक्षको निरीक्षण गर्नुभएको थियो । उहाँलाई राससका कार्यकारी अध्यक्ष धर्मेन्द्र झा र महाप्रबन्धक सिद्धराज राईले राससका सेवा, संरचना, शैली र भावी रणनीतिका बारेमा अवगत गराउनुभएको थियो ।

राससका नायब महाप्रवन्धक श्यामप्रसाद रिमालले तस्बिरका बारेमा पूर्वराष्ट्रपतिलाई जानकारी गराउनुभएको थियो । राससका कार्यकारी व्यवस्थापक शीतलप्रसाद महतोले राससको व्यवस्थापकीय विषयमा जानकारी गराउनुभएको थियो भने राससका प्रमुख समाचारदाता उत्तम सिलवाल, प्रधानसम्पादक एकराज पाठकले समाचार सङ्कलन र सम्प्रेषण प्रक्रियाबारे अवगत गराउनुभएको थियो ।

तस्बिर प्रदर्शनी सम्पन्न

गणतन्त्र गणतन्त्र दिवस २०८० का अवसरमा यही जेठ ११ गतेदेखि भद्रकालीस्थित राससको केन्द्रीय कार्यालयमा सुरु भएको ‘हाम्रोे संस्कृतिः हाम्रो सम्पदा’ शीर्षक तस्बिर प्रदर्शनी आज सम्पन्न भएको छ ।

नेपालका सांस्कृतिक पक्ष समेटेर राससबाट सम्प्रेषण भएका तस्बिर ‘हाम्रो संस्कृतिः हाम्रो सम्पदा’ शीर्षक प्रदर्शनीको एक समारोहकाबीच सञ्चार तथा सूचना प्रविधिमन्त्री रेखा शर्माले उद्घाटन गर्नुभएको थियो ।

प्रदर्शनीमा सातै प्रदेश एवं काठमाडौँ उपत्यकाका गरी ७७ तस्बिर समाविष्ट गरिएको थियो । राससका फोटो पत्रकारले खिचेका र सम्पादन कक्षबाट सेवाग्राहीमा सम्प्रेषण भइसकेका नेपालका विभिन्न चाडपर्व, जात्रा, मेला–महोत्सव तथा मठमन्दिर, गुम्बा, चैत्य, ताजियाजस्ता मूर्त–अमूर्त संस्कृति एवं सम्पदासम्बन्धी तस्बिर प्रदर्शनीमा राखिएको थियो ।

मुलुकका सबै भूगोलमा बस्ने सम्पूर्ण जाति, जनजाति, भाषाभाषी, सम्प्रदाय एवं धर्मावलम्बीलाई एउटै राष्ट्रिय भावधारामा समाहित गर्न रासस सांस्कृतिक तस्बिर प्रदर्शनीले योगदान पुर्याउने विश्वास गरिएको छ । संस्थाले यसअघि पनि आफ्नो वार्षिकोत्सव समारोहमा तस्बिर प्रदर्शनी गर्दै आएको छ । हरेक दिन बिहान ७ बजे खुला भई साँझ ७ बजेसम्म अवलोकनको समय निर्धारण गरिएको थियो ।

प्रदर्शनीको क–कस्ले गरे अवलोकन

राससमा प्रदर्शन गरिएको तस्बिरको विशिष्ट व्यक्तित्वहरुले अवलोकन तथा राससको निरीक्षण गर्नुभएको छ । राष्ट्रियसभाका अध्यक्ष गणेश तिमिल्सिना, उपप्रधानमन्त्री एवं गृहमन्त्री नारायणकाजी श्रेष्ठ, पूर्वराष्ट्रपति विद्यादेवी भण्डारी, तत्कालीन मन्त्रिपरिषद््का अध्यक्ष, खिलराज रेग्मी, संविधानसभाका अध्यक्ष सुभासचन्द्र नेम्वाङ, उद्योग, वाणिज्य तथा आपूर्तिमन्त्री रमेश रिजाल, संस्कृति, पर्यटन तथा नागरिक उड्डयनमन्त्री सुदन किरातीले प्रदर्शनीको अवलोकन गर्नुभएको थियो ।

यसैगरी नेपली कांग्रेसका नेता एवं पूर्वउपप्रधानमन्त्री प्रकाशमान सिंह, पूर्व उपप्रधानमन्त्री विमलेन्द्र निधि, लोकतान्त्रिक समाजवादी पार्टी नेपालका वरिष्ठ नेता एवं पूर्वउपप्रधानमन्त्री राजेन्द्र महतो, पूर्वसूचना तथा सञ्चार प्रविधिमन्त्री सुरेन्द्रकुमार कार्की, डा मीनेन्द्रप्रसाद रिजाल र दिलेन्द्रप्रसाद बडू, ललितपुर महानगरपालिकाका प्रमुख चिरिबाबु महर्जन, भक्तपुर नगरपालिकाका प्रमुख सुनिल प्रजापतिलगायतका पदाधिकारीले पनि तस्बिर प्रदर्शनीको अवलोकन गर्नुभएको थियो ।

त्यस्तै राजनीतिज्ञ, प्राध्यापक, कला–साहित्यपे्रमी, संस्कृतिकर्मी, आमसञ्चारकर्मीलगायत सर्वसाधारणलेसमेत रुचिपूर्वक प्रदर्शनी अवलोकन गर्नुभएको छ । अवलोकनका क्रममा विशिष्ट पदाधिकारी एवं कलासंस्कृति क्षेत्रका अग्रजले समग्र मुलुकको ऐतिहासिक सम्पदा र संस्कृति झल्काई तिनको संरक्षण, संवर्द्धन सहयोग पुर्याउने उद्देश्यले तस्बिर प्रदर्शनी आयोजना गरेकामा राससलाई धन्यवाद दिँदै भविष्यमा पनि यस किसिमका रचनात्मक कार्यक्रमले निरन्तरता पाउने विश्वास व्यक्त गर्नुभयो । उहाँहरूले यस किसिमको रचनात्मक कामका लागि राससलाई सक्दो सहयोग गर्ने प्रतिबद्धता व्यक्त गर्नुभएको छ ।

राससबाट सम्प्रेषित देशको धार्मिक, सामाजिक तथा सांस्कृतिक परिवेश झल्काउने ७७ वटा तस्बिर प्रदर्शनीमा राखिएको छ । विशेषगरी विभिन्न चाडपर्व, जात्रा, मठमन्दिर, गुम्बा, चैत्य, ताजियाजस्ता मूर्त–अमूर्त संस्कृति एवं सम्पदासम्बन्धी तस्बिरमा अवलोकनकर्ताको अभिरुचि देखिएको छ ।