तनहुँ । दमौली कारागारमा रहेका कैदीबन्दीलाई आज जनैपूर्णिमाको अवसरमा रक्षाबन्धन लगाइदिएको छ । बह्माकुमारी ईश्वरीय विश्वविद्यालय नेपाल शाखा कार्यालय दमौलीले उनीहरूलाई रक्षाबन्धन लगाइदिएको हो ।
दमौली शाखाकी सञ्चालिका बह्माकुमारी यमुनालगायतले यहाँका कैदीबन्दीलाई रक्षाबन्धन बाँधिदिनुभएको हो । कारागारका महिला र पुरुष दुवैलाई रक्षाबन्धन अवसर प्रदान गरिएको कारागारका निमित्त प्रमुख नारायणप्रसाद अधिकारीले जानकारी दिनुभयो ।
उहाँका अनुसार जनैपूर्णिमा मनाउन नपाएर खल्लो नहोस् भन्नको लागि इच्छुक सबैका लागि रक्षाबन्धन अवसर प्रदान गरिएको हो । कारागारमा हाल २७ महिला र पुरुष तीन सय २६ जना कैदीबन्दी रहेका उहाँले जानकारी दिनुभयो ।
ब्राह्मण समाजको सामूहिक रक्षाबन्धन
जातीय सद्भावका लागि जनैपूर्णिमाका अवसरमा बाह्मण समाज तनहुँद्वारा दमौलीमा आज सामूहिक रक्षाबन्धन कार्यक्रम गरिएको छ । जातीय सद्भाव, सहिष्णुता तथा सामाजिक समानता कायम गर्ने उद्देश्यले सामूहिक रक्षाबन्धन कार्यक्रम गरिएको समाजका जिल्ला अध्यक्ष कृष्णचन्द्र पाण्डेले जानकारी दिनुभयो ।
अध्यक्ष पाण्डेले भन्नुभयो, “रक्षाबन्धनका लागि सबैलाई सहज वातावरण होस् तथा जातीय सद्भाव, सहिष्णुता तथा सामाजिक समानता कायम गर्ने उद्देश्यले सामूहिक रक्षाबन्धन कार्यक्रम गरिएको हो ।”
सामाजिक त्रुटिका रूपमा रहेको जातीय विभेद्को अन्त्यका लागि यस्ता कार्यक्रमले सहयोग पुग्ने विश्वास लिइएको छ । दमौलीस्थित परासर आश्रमका गुरु र बटुकहरूले रक्षासूत्र लगाइदिनुभएको थियो । उक्त कार्यक्रममा विभिन्न जातजातिका मानिसको सहभागिता रहेको थियो ।
कार्यक्रममा दुई सयभन्दा बढी सर्वसाधारणले सूत्र बाँध्नुभएको समाजको कोषाध्यक्ष गङ्गाप्रसाद पोख्रेलले जानकारी दिनुभयो । समाजले गत वर्ष पनि सामूहिक रक्षाबन्धन कार्यक्रम गरेको थियो । समाजले गरेको यो सामूहिक रक्षाबन्धन कार्यक्रम जातीय समानताका लागि टेवा पुगेको गण्डकी प्रदेशका पूर्वमन्त्री तथा संयुक्त राजनीतिक दल दलित सङ्घर्ष समितिका संयोजक डोबाटे विश्वकर्माले बताउनुभयो ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.