काठमाडौँ ।  जलवायु परिवर्तनका असर न्यूनीकरण गर्न आवाज उठाउने र त्यसबाट परेको असरको न्याय माग गर्ने उद्देश्यले यही शनिबार ‘जलवायु जन मार्च २०८१’ आयोजना गरिने भएको छ । आज यहाँ आयोजित पत्रकार सम्मेलन गर्दै आयोजकहरूले विश्वभरका औद्योगिक राष्ट्रलाई जलवायु वित्त भुक्तानीका लागि दबाब दिन जनस्तरबाट मार्च गर्न लागिएको बताएका छन् ।

पत्रकार सम्मेलनमा दिगो विकास इन्स्टिच्युटकी सुस्मिता बैदवारले औद्योगिक राष्ट्रहरूले जलवायु सङ्कट निम्त्याउन महत्त्वपूर्ण भूमिका खेलेको हुँदा तिनले समस्यामा परेका राष्ट्रहरूलाई नियमित आर्थिक सहायता प्रदान गर्नुपर्नेमा जोड दिनुभयो । उहाँले भन्नुभयो, “वातावरण संरक्षणमा ढिलाइ गर्ने समय छैन, र जलवायु परिवर्तनले अन्यायमा परेका हाम्रो जस्तो मुलुकको न्याय सुनिश्चित गर्न तुरुन्तै निर्णायक कदम चाल्नुपर्छ ।” त्यस्तै, युथ एड्भोकेसी नेपालका नरेन खतिवडाले विकसित राष्ट्रहरूले जलवायु सङ्कटलाई बढावा दिने प्रणालीबाट फाइदा उठाउँदै आएको बताउनुभयो ।

उहाँले अब ती राष्ट्रहरूले आफ्नो दायित्व पूरा गरेर जलवायु न्यायको बाटोमा अघि बढ्नुपर्नेमा जोड दिनुभयो । राष्ट्रिय आदिवासी जनजाति अपाङ्गता महिला सङ्घका अध्यक्ष प्रतिमा गुरुङले जलवायु परिवर्तनले सबैभन्दा बढी प्रभावित समुदायलाई न्याय दिन जलवायु वित्तको महत्त्व रहेको उल्लेख गर्दै त्यसमा सीमान्तकृत समुदायको आवाजलाई विशेष ध्यान दिनुपर्ने बताउनुभयो ।

आगामी मङ्सिरमा अजरबैजानमा हुने संयुक्त राष्ट्रसङ्घको जलवायु परिवर्तन सम्मेलनमा जलवायु वित्तको मुद्दामा ठोस् निर्णय हुने अपेक्षा गरिएको आयोजकले बताएको छ । नेपालमा पछिल्ला समय जलवायु परिवर्तनले विविध चुनौती ल्याएको हुँदा यसलाई सम्बोधन गर्न समयमै आवश्यक कदम चाल्नुपर्नेमा सबैले जोड दिनुभयो । मार्च शनिबार बिहान ललितपुरको जावलाखेल चोकबाट सुरु भई पाटन दरबार क्षेत्रसम्म पुग्ने कार्यक्रम छ ।

सरकार लक्षित प्रचण्डको चेतावनीः इतिहासलाई बेवास्ता गरे देशमा फेरी नयाँ परिस्थिति

हरित क्रान्ति मार्फत देशलाई समृद्ध बनाउँछौँ : कुलमान घिसिङ

कोजाग्रत पूर्णिमामा राष्ट्रपति पौडेलद्वारा भक्तपुरको प्रसिद्ध नवदुर्गा मन्दिरमा पूजाअर्चना