होटल व्यवसायी संघ चितवनले उद्योग वाणिज्य संघ–चितवनको आसन्न अधिवेशनका लागि उपाध्यक्ष पदमा जनक पौडेललाई सर्वसम्मत रूपमा उमेदवार मनोनयन गरेको छ। संघको हालै सम्पन्न कार्यसमिति बैठकले पौडेललाई उपाध्यक्ष, वस्तुगत तर्फ कार्यसमिति सदस्यका लागि कृष्ण भट्ट तथा उद्योगतर्फ कार्यसमिति सदस्यका लागि इमान्दु बराललाई उम्मेदवार बनाउने निर्णय गरेको अध्यक्ष कृष्ण भट्टले जानकारी दिए। उद्योग वाणिज्य संघ–चितवनको पुस १९ देखि २१ गतेसम्म अधिवेशन हुँदैछ। नयाँ नेतृत्व चयनका लागि हुने यो अधिवेशनलाई चितवनका व्यवसायी समुदायले विशेषरूपमा हेरिरहेका छन्। नेतृत्वमा को आउने भन्ने विषयले व्यवसायी वृत्तमा सक्रिय बहस र छलफल बढेको छ।
उपाध्यक्ष पदका उम्मेदवार जनक पौडेलले संघले गरेको विश्वासप्रति धन्यवाद व्यक्त गर्दै व्यवसायी समुदायको निरन्तर सहयोग र समर्थनको अपेक्षा गरे। उनले आफू लामो समयदेखि व्यवसायीका हितका मुद्दामा काम गर्दै आएको उल्लेख गर्दै आगामी दिनमा व्यवसायीले भोगिरहेका संरचनागत, नीतिगत तथा प्रशासनिक समस्याका समाधानमा जोड दिने बताए। “चितवनका व्यवसायी विभिन्न प्रकारका चुनौतीबाट गुजरिरहेका छन्।
कर, अनुमति प्रक्रिया, बजारको अस्थिरता तथा पर्यटन क्षेत्रको पुनरुत्थानजस्ता विषय प्रमुख छन्। यी समस्यालाई टिपोट मात्र होइन, व्यावहारिक समाधानमा लैजाने उद्देश्यले नै मेरो उमेदवारी परेको हो,” पौडेलले भने। उनका अनुसार उद्योग वाणिज्य संघको नेतृत्वमा पहुँच र समन्वय क्षमता प्रभावकारी भएमा चितवनको व्यवसायिक वातावरण अझ खुला, व्यवस्थित र स्थिर बनाउन सकिनेछ। उनले विभिन्न व्यवसायिक संघ–संस्थाबीच समन्वय र सरकारी निकायहरूसँग सहकार्यलाई प्राथमिकता दिने प्रतिवद्धता व्यक्त गरे।
होटल व्यवसायी संघ चितवनका अध्यक्ष कृष्ण भट्टले पनि आगामी अधिवेशन व्यवसायीका प्रत्यक्ष मुद्दालाई केन्द्रमा राखेर सशक्त नेतृत्व चयन गर्ने अवसर भएको बताए। उनका अनुसार संघले मनोनयन गरेको उम्मेदवार टोली सक्षम, अनुभवसहित र व्यवसायिक हितका मुद्दामा गहिरो बुझाइ भएको टोली रहेको छ। चितवनका व्यवसायीहरूले आगामी अधिवेशनलाई स्थानीय उद्योग, व्यापार र पर्यटन क्षेत्रको भविष्यसँग जोडेर हेर्दै आएका छन्। नेतृत्व चयनपछि चितवनको व्यवसायिक वातावरण कत्तिको गतिशील बन्छ भन्ने विषयमा सबैको चासो केन्द्रित छ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.