चितवन । दुर्लभ एकसिङ्गे गैँडाका लागि प्रसिद्ध चितवनमा स्थापित क्रिकेट क्लब चितवन राइनोजले गैँडा संरक्षणमा योगदान गर्ने भएको छ । क्लबले आफ्ना टिसर्टलगायत सामग्री बिक्रीबाट प्राप्त रकमको पाँच प्रतिशत गैँडा संरक्षणमा लगानी गर्ने घोषणा गरेको हो ।
चितवन राइनोज स्पोर्ट्स क्लबका अध्यक्ष आयुष न्यौपानेले क्लबको नाम नै गैँडासँग जोडिएकाले यसको संरक्षणमा योगदान गर्न लागेको बताउनुभयो । “हाम्रो नाम नै गैँडासँग जोडिएकाले हामी यसको संरक्षणमा पनि योगदान दिन लागेका हौँ,” उहाँले भन्नुभयो ।
नेपाल प्रिमियर लिग (एनपिएल) मा तेस्रोपटक सहभागी हुन लागेको चितवन राइनोजले क्रिकेटमार्फत चितवन र यहाँको जैविक विविधतालाई विश्वसामु चिनाउँदै आएको छ । क्लबले आफ्नो लोगो तथा विभिन्न सामग्रीमा एकसिङ्गे गैँडाको तस्बिर समावेश गरी संरक्षणसम्बन्धी सन्देश प्रवाह गर्दै आएको छ ।
चितवन मेडिकल कलेजको भगिनी संस्थाका रूपमा रहेको चितवन राइनोजले पर्यापर्यटनका लागि प्रसिद्ध चितवन राष्ट्रिय निकुञ्ज र यहाँ पाइने दुर्लभ गैँडाको पहिचानलाई क्रिकेटमार्फत थप प्रचारप्रसार गरिरहेको छ । गैँडाको नामबाट स्थापित क्लबले खेलकुद र वन्यजन्तु संरक्षणलाई एकसाथ अघि बढाउने प्रयास गरेको हो ।
एनपिएलको पहिलो संस्करणमा चौथो स्थान हासिल गरेको चितवन राइनोज दोस्रो संस्करणमा सातौँ स्थानमा सीमित भएको थियो । यसपटक भने उपाधि जित्ने लक्ष्यसहित मैदानमा उत्रिन लागेको क्लबका निर्देशक प्रताप देवकोटाले बताउनुभयो ।
क्लबका खेल हेर्न र टोलीलाई समर्थन गर्न चितवनका विभिन्न स्थानमा प्रत्यक्ष प्रसारणको व्यवस्था गरिएको उहाँले जानकारी दिनुभयो । भरतपुरको वीरेन्द्र क्याम्पस चौर, विशाल चोक, दीपेन्द्र चोकस्थित चितवन स्पाइसी हर्बलगायत जिल्लाका विभिन्न स्थानमा खेलको प्रत्यक्ष प्रसारण गरिनेछ । यसले स्थानीय खेलप्रेमीलाई एकै ठाउँमा भेला भएर टोलीलाई समर्थन गर्ने अवसर प्रदान गर्ने अपेक्षा गरिएको छ ।
चितवन राइनोजले गैँडा संरक्षणसँगै स्थानीय खेलकुद र सामाजिक गतिविधिमा पनि सहयोग गर्दै आएको निर्देशक देवकोटाले बताउनुभयो । क्लबले स्थानीय क्लबहरूलाई सहयोग गर्नुका साथै भोटेकोशी बाढीबाट प्रभावितलाई समेत सहयोग गरेको छ । जिल्लामा आयोजना हुने विभिन्न सांगीतिक कार्यक्रमहरूमा प्रायोजकका रूपमा सहकार्य गर्दै आएको उहाँले जानकारी दिनुभयो ।
“गैँडा संरक्षण गर्दै क्रिकेट खेलको प्रवर्द्धनमा हामी लागेका छौँ,” देवकोटाले भन्नुभयो ।
जिल्ला समन्वय समिति चितवनका प्रमुख नारायणप्रसाद अधिकारीले एनपिएलमा सहभागी आठ टोलीमध्ये चितवनको प्रतिनिधित्व गर्ने क्लब रहनु जिल्लाका लागि गौरवको विषय भएको बताउनुभयो । चितवनको नाममा स्थापित क्लबले जिल्लाको पहिचान राष्ट्रिय तथा अन्तर्राष्ट्रियस्तरमा पुर्याउन सहयोग गर्ने उहाँको भनाइ छ ।
खेलकुदले अनुशासन र सामूहिक भावनाको विकास गर्ने उल्लेख गर्दै उहाँले आम नागरिकलाई खेलप्रति आकर्षित गर्न यस्ता क्लबले महत्त्वपूर्ण भूमिका खेल्ने बताउनुभयो ।
एनपिएलको तेस्रो संस्करण सुरु हुन लागेसँगै चितवनमा क्रिकेटको माहोल बढेको छ । जिल्लाका होटल, रेस्टुरेन्ट तथा सार्वजनिकस्थलमा खेलप्रेमीहरू भेला भएर टोलीको समर्थन गर्ने तयारीमा छन् । सडक किनारका बिजुलीका पोल, होटल, रेस्टुरेन्ट र अन्य सार्वजनिकस्थलमा चितवन राइनोजको लोगो अंकित झण्डा फहराइरहेका छन् ।
आजदेखि सुरु हुने एनपिएलको तेस्रो संस्करणमा चितवन राइनोजले उपाधि जित्ने लक्ष्य राखेको छ । क्रिकेटको प्रवर्द्धनसँगै गैँडा संरक्षणमा आर्थिक योगदान गर्ने क्लबको योजनाले खेलकुदलाई सामाजिक तथा वातावरणीय उत्तरदायित्वसँग जोड्ने अपेक्षा गरिएको छ ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.