काठमाडौं । हाल नेपालमा पश्चिमी वायुको आंशिक प्रभाव रहेको र देशका हिमाली तथा पहाडी भू–भागमा आंशिक बादल लागेको नेपाल मौसम विज्ञान विभाग, मौसम पूर्वानुमान महाशाखाले जनाएको छ। महाशाखाले शुक्रबार साँझ मंसिर १ गतेसम्मको मौसम पूर्वानुमान बुलेटिन सार्वजनिक गर्दै आइतबार देशका विभिन्न उच्च पहाडी तथा हिमाली भेगमा हल्कादेखि मध्यम वर्षा र हिमपातको सम्भावना औँल्याएको हो। महाशाखाका अनुसार शुक्रबार राति देशका हिमाली र पहाडी भू–भागमा आंशिक बदली रहनेछ भने कोशी, बागमती, गण्डकी र कर्णाली प्रदेशका हिमाली भू–भागका एक–दुई स्थानमा हल्का वर्षा र हिमपातको सम्भावना छ।
यस्तै, शनिबार दिउँसो कोशी, बागमती र गण्डकी प्रदेशका हिमाली र पहाडी भू–भागमा साधारणतया बदली रहनेछ। मधेश प्रदेशका साथै कोशी, बागमती र गण्डकीका तराई भू–भाग र बाँकी हिमाली तथा पहाडी भेगमा आंशिक बदली रहे पनि बाँकी तराईमा मौसम मुख्यतया सफा रहने महाशाखाले जनाएको छ। शनिबार दिउँसो कोशी, बागमती र गण्डकीका हिमाली तथा पहाडी भू–भाग र कर्णाली तथा सुदूरपश्चिमका हिमाली भेगका एक–दुई स्थानमा हल्का वर्षा र हिमपात हुन सक्ने अनुमान छ। शनिबार राति पनि कोशी, गण्डकी र कर्णाली प्रदेशका हिमाली भू–भागका एक–दुई स्थानमा हल्का वर्षा तथा हिमपातको सम्भावना कायमै रहनेछ। आगामी आइतबार भने मौसममा तुलनात्मक रूपमा बढी बदली देखिने महाशाखाको पूर्वानुमान छ।
आइतबार दिउँसो कोशी, गण्डकी, कर्णाली र सुदूरपश्चिम प्रदेशका हिमाली र पहाडी भू–भाग तथा लुम्बिनी प्रदेशको हिमाली भू–भागमा साधारणतया बदली भई बाँकी स्थानमा आंशिक बदली रहनेछ। सो क्रममा गण्डकी, कर्णाली र सुदूरपश्चिम प्रदेशका हिमाली तथा पहाडी भू–भागका थोरै स्थानमा मेघगर्जन, चट्याङ र असिनासहित मध्यमसम्मको वर्षा र हिमपातको सम्भावना रहेको छ। साथै, कोशी, बागमती र लुम्बिनी प्रदेशका हिमाली र पहाडी भू–भागका एक–दुई स्थानमा हल्का वर्षा वा हिमपात हुनसक्नेछ। आइतबार राति देशका हिमाली भू–भागमा साधारणतया बदली र पहाडी भू–भागमा आंशिक बदली रही देशका हिमाली भेग तथा कोशी, बागमती, गण्डकी र कर्णाली प्रदेशका पहाडी भू–भागका एक–दुई स्थानमा हल्का वर्षा र हिमपातको सम्भावना रहेको छ। सोमबार र मंगलबारदेखि भने देशको मौसममा क्रमशः सुधार आउने देखिएको छ।
कार्तिक ३० र मंसिर १ गते कोशी, बागमती र गण्डकी प्रदेशका हिमाली र पहाडी भू–भागमा आंशिक बादल लागे पनि देशका बाँकी भू–भागमा मौसम मुख्यतया सफा रहनेछ। सोमबार कोशी प्रदेशका हिमाली र पहाडी क्षेत्र तथा बागमती र गण्डकीका हिमाली भेगका एक–दुई स्थानमा हल्का वर्षा र हिमपातको सम्भावना छ भने मंगलबार कोशी प्रदेशका हिमाली र पहाडी भू–भागका एक–दुई स्थानमा मात्र यस्तो सम्भावना रहनेछ। यस पाँचदिने अवधिभर तराई भू–भाग, उपत्यका तथा खोँचहरूमा बिहानपख थोरै स्थानमा हुस्सु र कुहिरो लाग्ने महाशाखाले उल्लेख गरेको छ।








