चितवन । सप्तगण्डकी बहुमुखी क्याम्पसमा स्नातक तहमा अध्ययनरत आमसञ्चार तथा पत्रकारिता विषयका विद्यार्थीलाई तिन दिने कार्यशाला आजबाट सुरु भएको छ । सप्तगण्डकी बहुमुखी क्याम्पसको समन्वयमा अदब मिडिया प्रालिको आयोजनामा भएको कार्यशालालाई भरतपुर महानगरपालिका वडा नम्बर १० ले सहयोग गरेको हो ।कार्यशालाको उद्घाटन गर्दै सप्तगण्डकी बहुमुखी क्याम्पसका क्याम्पस प्रमुख मणिराज महतोले क्याम्पसका विद्यार्थीहरु देश तथा विदेशका मिडियामा सफल सञ्चारकर्मीको रुपमा काम गर्नु गौरवको विषय भएको बताए ।
उनले भने, ‘ आमसञ्चार तथा पत्रकारिता प्रयोगात्मक विषय हो । यसमा सैद्धान्तिक विषय भन्दा पनि काम गर्दै सिक्ने कुरा हो ।’ नयाँ प्राध्यापकहरुको संख्या थपेर भए पनि क्याम्पसले स्नात्तकोत्तर तहमा आमसञ्चार विषय अध्यापन अनुमति ल्याउने सोच बनाइरहेको बताए । क्याम्पस प्रमुख महतोले कलेजमा रहेको रेडियो र टेलिभिजनका ल्याब प्रभावकारी ढंगले नियमित सञ्चालन गर्नका लागि क्याम्पस प्रशासन सहयोग गर्न तयार रहेको बताए । यसैगरी कार्यक्रममा पत्रकार महासंघ चितवनका अध्यक्ष राधेश्याम खतिवडाले पत्रकारले सैद्धान्तिक विषयमा मात्रै आवद्ध नभई व्यवहारिक रुपमा पनि अघि बढ्नुपर्ने बताए ।
उनले सप्तगण्डकी क्याम्पसमा आमसञ्चार तथा पत्रकारिता अध्ययनरत विद्यार्थीहरुलाई पत्रकार महासंघ सधै जस्तोसुकै सहयोग गर्न पनि तयार रहेको बताए । कार्यक्रममा क्याम्पसका आमसञ्चार तथा पत्रकारिता विषयका प्राध्यापक मधुसूदन दवाडीले नेपालमा तीव्ररुपमा विकास भएको कुनै क्षेत्र छ भने सञ्चार क्षेत्र नै हो भन्दै यस क्षेत्रमा नयाँ कुरा सिकेर कहिल्यै पनि नसकिने बताए । उनले क्याम्पसमा पहिलोपटक यसप्रकारको कार्यशाला सञ्चालन गरेकोमा अदब मिडिया प्रालिलाई धन्यवाद दिँदै यसको भरपुर उपयोग गर्न विद्यार्थीलाई अनुरोध गरे । कार्यशालाको उद्घाटन शत्रमा सप्तगण्डकी आमसञ्चार क्लबका अध्यक्ष असल गैरेले स्वागत मन्तव्य राखेका थिए ।
कार्यशालाको पहिलो दिन चितवनका कान्तिपुर दैनिकका संवाददाता पत्रकार रमेशकुमार पौडेल प्रशिक्षक रहेका थिए । उनले आफ्नो पत्रकारिता अनुभव सुनाएका थिए । समाचार लेख्दा सूचना कसरी लिने, समाचारका स्रोतहरु के के छन् र समाचार लेख्दा ध्यान दिनुपर्नेलगायतका बारेमा बताएका थिए । पत्रकार भनेको सधै तयारी अवस्थामा हुनुपर्ने पौडेलले बताए । कार्यशालाको दोस्रो दिन पत्रकार प्रतिमा सिलवालले प्रशिक्षण दिँदै छन् । कार्यशालामा स्नातक तहमा आमसञ्चार विषय अध्ययनरत ३८ जना विद्यार्थीको सहभागिता रहेको छ ।
विसं २०६३ बाट क्याम्पसमा स्नातक तहमा आमसञ्चार तथा पत्रकारिता विषय अध्यापन सुरु भएको हो । क्याम्पसबाट उर्तीर्ण विद्यार्थीहरु अहिले विभिन्न राष्ट्रिय तथा अन्तर्राष्ट्रिय मिडिया तथा संघसंस्थामा सम्वाददाता, समाचार प्रस्तोता, सम्पादक, सञ्चार विज्ञ, चलचित्र निर्देशक, कलाकार, जनसम्पर्क अधिकृत, सञ्चार अधिकृत, अनुसन्धानकर्ता र प्रवक्ताको रुपमा कार्यरत रहेको क्याम्पसले जनाएको छ ।
क्याम्पसका आमसञ्चार विषयका प्राध्यापक तथा अदव मिडियाका कार्यकारी निर्देशक दिपेन्द्र अधिकारीले कार्यशालाको संयोजन गरेका हुन् ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.