रसुवा र रौतहटसहितका जिल्लाको क्रियाशील सदस्यता विवाद टुंगो लाग्न नसक्दा अन्य जिल्लाको पनि अधिवेशन प्रक्रिया अघि बढ्न नसकेको भन्दै निर्वाचन समितिका अधिकारीले विवाद तत्काल सुल्झाइदिन नेताहरूसँग आग्रह गरेका थिए। जवाफमा पार्टी सभापतिसमेत रहेका प्रधानमन्त्री देउवाले मंसिरभित्र १४औं महाधिवेशन गर्नुपर्ने बताउँदै सोहीअनुसार तयारी गर्न आग्रह गरेका थिए। मंसिर ९ देखि १३ का लागि तोकिएको मितिमा महाधिवेशन नहुनेमा सहमत रहेका नेताहरूले अन्तिम सातासम्म महाधिवेशन गर्नुपर्नेमा जोड दिएका थिए। बैठकमा पुग्नेबित्तिकै देउवाले आफूले महाधिवेशन गर्न नचाहेको भन्ने पौडेलको आरोपको खण्डन गरेका थिए।

दस मिनेटभन्दा बढी समय देउवा र पौडेलबीच महाधिवेशन गर्न चाहेको वा नचाहेको विषयमा विवाद भएको थियो। सदस्यता विवाद टुंगो लगाउन आफूले नेताहरूलाई जिम्मेवारी दिएको भन्दै देउवाले आफ्नो प्रतिरक्षा गरेका थिए। पौडेलले महाधिवेशनप्रति सभापतिको लगाब नभएको आरोप लगाएका थिए। भदौ १८ बाट तल्लो तह (वडा) अधिवेशन सुरु गरेको कांग्रेसले केही जिल्लाको क्रियाशील सदस्यता टुंगो लगाउन सकेको छैन। विवाद टुंगा लाग्न नसक्दा १३ जिल्लामा तल्लो तहको अधिवेशन सुरु हुन सकेको छैन।

एक दर्जन जिल्लाले सबै तहका अधिवेशन सकेका छन्। बाँकीले पालिकासम्मको अधिवेशन सके पनि अरू प्रक्रिया अघि बढ्न सकेको छैन। महाधिवेशनका लागि तयारी गर्नुपर्ने अन्य विषयमा पनि अहिलेसम्म कांग्रेसले छलफल थालेको छैन। सभापति देउवा आमनिर्वाचनअघि पार्टी महाधिवेशन टार्ने र चुनावपछि मात्र गर्ने पक्षमा छन्। नागरिक दैनिकमा खबर छ ।