रत्ननगर । रत्ननगर खानेपानी तथा सरसफाई उपभोक्ता संस्थाले खानेपानीकाे सेवा क्षेत्र विस्तार गरेको छ । बछौली खानेपानी तथा उपभोक्ता संस्थासंग एकअर्कामा समायोजन गर्दै रत्ननगरले खानेपानीले सेवा क्षेत्र विस्तार गरेको हो । लामो समय देखि सञ्चालनमा रहेको रत्ननगर खानेपानीमा केही बर्ष अघि मात्र सञ्चालनमा आएको बछौली खानेपानी समायोजन गरिएको हो । रत्ननगर खानेपानीले आइतबार पत्रकार सम्मेलन गरी एउटै उद्देश्य बोकेका दुई वटा संस्थाको प्रभावकारी सञ्चालनको लागि समायोजन गरिएको जनाएको छ । दुई संस्था बीच एकीकरण भएपछि उपभोक्ताको संख्या १२ हजार ७८० पुगेको छ ।

समायोजन पूर्व रत्ननगर खानेपानीको उपभोक्ता संख्या १२ हजार १० र बछौली खानेपानीका उपभोक्ताहरुको संख्या ७७० रहेको थियो । रत्ननगर खानेपानीले रत्ननरको वडा नं १,२,३,४,५,८,९,१०,११,१२,१३ र बछौली खानेपानीले वडा नं ६ र ७ का उपभोक्तालाई पानी वितरण गर्दै आएको थियो । समायोजन पछि रत्ननगर खानेपानीको संस्थागत घारा १५८, सामुिहक धारा २५६, विपन्न बर्गको धारा ८५५ र निजी घारा ११ हजार ५११ गरि उपभोक्ताको संख्या १२ हजार ७८० पुगेको अध्यक्ष माधवप्रसाद अर्यालले जानकारी दिए ।

उनले आफू निर्वाचित भएर आएको एक बर्षमा दुई संस्था बीच एकीकरण, धारा जडानमा २५ प्रतिशत छुट, पाईपलाइन विस्तार, उपभोक्ता संख्या वृद्धि र पानी सुरक्षाको लागि अर्थपूर्ण काम गरिएको बताए । १० महिनाको अबधिमा एक हजार ५० उपभोक्ता थप तथा ७९ किलोमिटर पाइपलाईन विस्तार गर्न सफल भएको बढाउन सफल भएको अध्यक्ष अर्यालले जानकारी दिए । दुई संस्था एकीकरण भएपछि बछौलीका उपभोक्तालाई सहज रुपमा खानेपानीको व्यवस्था गर्न ट्याङ्की मर्मत, पाईपलाइन विस्तारमा ध्यान केन्द्रीत गरिएको अध्यक्ष अर्यालले जानकारी दिए ।

सेवा क्षेत्र भित्रका ८१ प्रतिशत घरधुरीमा खानेपानी पु–याएका छौैं उनले भने बाँकी १९ प्रतिशत घरधुरीमा पानी पु–याउन पाइपलाइन विस्तार र छुट प्याकेज कार्यक्रम ल्याइएको उनले बताए । २०५८ सालमा सरकारको ५० प्रतिशत र उपभोक्ताको ५० प्रतिशत लगानीबाट सुरु भएको सो आयोजना २०७३ सालमा सरकारको ७० प्रतिशत र उपभोक्ताको ३० प्रतिशतको मर्मत सम्भार योजना सम्पन्न गरी २०७५ सालमा सोही अनुसारको सह लगानीमा निर्माण कार्य सम्पन्न भएको थियो ।

सो खानेपानीले दसैंमा सबै उपभोक्तालाई एक महिनाको महसुल छुटसंगै अतिविपन्न, अपाङ्ग, एकल महिला र पुरुषहरुलाई धारा जडानमा ५० प्रतिशत र विषेश अफर सहित अन्य उपभोक्तालाई २५ प्रशित सम्म छुट दिँदै आएको उपाध्यक्ष कृष्णप्रसाद सापकोटाले जानकारी दिए । अहिले सम्म साविकको रत्ननगरमा ४२४ किलोमिटर र बछौलीमा ५४ किलोमिटर गरी ४७५ किलोमिटर पाइपलाइन विस्तार गरिएको छ । सो संस्थाले बैंकहरुसंगको सहकार्यमा बजारक्षेत्रका शान्तिकचोक, टाँडीचोक, सौराहाचोक, निपनीचोक र भानुचोकमा सार्वजनिक धारा सञ्चालनमा ल्याएको सचिव प्रताप डल्लाकोटीले जानकारी दिए ।

सो संस्थाले पानीको महसुल बापत मासिक करिब ३९ लाख ५० हजार सम्म आम्दानी गर्दै आएको छ । संस्थाले गरेको आम्दानीबाट कर्मचारीलाई मासिक तलबसंगै आयोजनाको मर्मत तथा सरसफाईको क्षेत्रमा समेत खर्च गर्दै आएको कोषाध्यक्ष सरस्वती लामाले जानकारी दिइन् । वडा नं १ देखि १३ सम्ममा १५ हजार ८०९ घरधुरी मध्ये १२ हजार ७८० घरधुरीमा खानेपानी पुगेको र बाँकी रहेका ३ हजार २९ घरधुरीमा एक घर एक धाराको लक्ष्य अनुसार कार्य भइरहेको उनले जानकारी दिइन् ।

संस्थाका व्यवस्थापक विश्व पौडेलले अनलाईन मार्फत महसुल भुक्तानी गर्ने उपभोक्ताको संख्या बढेको जानकारी दिदै अनलाईन मार्फत महसुल भुक्तानी गर्ने उपभोक्ता ४५ प्रतिशत रहेको बताए । पत्रकार सम्मेलनमा कार्यसमितिका सदस्य मीना श्रेष्ठ, लक्ष्मी कुमारी भट्ट लामिछाने, केशवनारायण श्रेष्ठ, शशीकला प्रधान,इश्वर खनाल तथा लेखा समिति संयोजक जीवनलाल श्रेष्ठ,सदस्य पार्वती घिमिरे लगायतको सहभागिता रहेको थियो । यसैबीच सो संस्थाले साउन ६ गते मुटुरोग सम्बन्धी निःशुल्क स्वास्थ्य शिविर आयोजना गर्ने जनाएको छ ।

पत्रकार सम्मेलनमा उपभोक्ताहरुको स्वास्थ्य सुरक्षाको लागि सो शिविर आयोजना गरिएको अध्यक्ष माधवप्रसाद अर्यालले जानकारी दिए ।

न्युजरुममा प्रहरी हस्तक्षेप गलत, प्रेस स्वतन्त्रताको सम्मान गर्न सरकारलाई रास्वपाको निर्देशन

चितवनका दृष्टिविहीनलाई सेतो छडी वितरण

रास्वपा महामन्त्री नेतृत्वको प्रतिनिधिमण्डल चीन भ्रमणमा जाने