☰

भर्खरै

लोकप्रिय समाचार

सेन्ट्रल कलेजको १६ औं वार्षिकोत्सव : नयाँ भवन उद्घाटन, रक्तदान र खेल सामग्री वितरण

  •   आइतबार, साउन २७, २०८१ मा प्रकाशित
    • अ
    • अ
    • अ

    चितवन । सेन्ट्रल कलेज अफ भोकेसनल ट्रेनिङ प्रालिले विविध कार्यक्रम गरी १६ औं वार्षिकोत्सव मनाएको छ । कलेजले शुक्रबार र शनिबार दुई दिन विविध कार्यक्रम गरेर वार्षिकोत्सव मनाएको हो । वार्षिकोत्सवसँगै कलेजको नवनिर्मित आफ्नै भवन सेन्ट्रल टावरको उद्घाटन गरिएको छ । यस्तै सेन्ट्रल ग्रुपद्धारा सञ्चालित सेन्ट्रल मोडल कलेजको पनि उद्घाटन गरिएको छ ।

    कलेजको प्रिन्सिपल यज्ञबिलास पौडेल (वाइबी) ले एक कार्यक्रमकाबीच सेन्ट्रल टावर र सेन्ट्रल मोडल कलेजको उद्घाटन गर्नुभयो । त्यस अघि पहिलो दिन बिहान रक्तदानबाट वार्षिकोत्सव कार्यक्रम सुरु भएको थियो । कलेज परिसरमा नै भएको कार्यक्रममा एक सय ४३ जनाले रक्तदान गरेका थिए । चितवनमा हुने रगत अभावलाई मध्यनजर गर्दै उक्त कार्यक्रम आयोजना गरिएको हो । सोही दिन कलेजले चितवन, नवलपुर र तनहुँका बिभिन्न क्लबहरुलाई खेल सामाग्री सहयोग गरेको थियो ।

    कलेजले करिब एक सय ५० वटा फुटबल, भलिवल तथा क्रिकेट क्लबहरुलाई खेल सामग्री सहयोग गरेको हो । फुटबल, भलिवल, क्रिकेट ब्याट र जर्सी गरी १५ लाख बराबरको खेल सामाग्री सहयोग गरिएको कलेजका प्रिन्सिपल पौडेलले जानकारी दिनुभयो । चितवन जिल्ला फुटबल संघ, क्रिकेट संघ चितवन र जिल्ला भलिवल संघ सँगको समन्वयमा उक्त कार्यक्रम सेन्ट्रल टावरको सभाहलमा सम्पन्न भएको थियो । कार्यक्रममा तिनै जिल्लाका खेलाडी, संघका पदाधिकारीलगायतको सहभागीता रहेको थियो ।

    कलेजले मिडिया क्षेत्रबाट नारायणी अनलाइन, खेल पत्रकार सुशिल पन्त र एसवान बिल्डर्सलाई सम्मान गरेको छ । यस्तै सामाजिक कार्य गर्दै आएका ५० वटा संस्थालाई सम्मान पनि गरेको छ । यस्तै पहिलो दिन नै चर्चित कलाकारहरुले सांगितिक प्रस्तुति पनि दिएका थिए । चर्चित लोक तथा दोहोरी गायक पशुपति शर्मा, नेपाल आईडल सिजन ५ का विजेता करण परियार र कमेडी च्याम्पियन सुनिल खड्काले आफ्नो प्रस्तुतिबाट दर्शक झुमाएका थिए । साँस्कृतिक कार्यक्रमपछि सेन्ट्रल कलेजको निर्माण रहेको म्युजिक भिडियोको प्रिमियर गरिएको थियो । सञ्जय बराल र मन्मा राईको स्वरमा रहेको नयन त्यो गाँजलु बोलको गीत सार्वजनिक गरिएको हो ।

    सेन्ट्रल टावरमा छाँयाकन गरिएको उक्त गीतको भिडियोमा मिस पबी, सूर्य तिमल्सिना, कलेजका प्रिन्सिपल यज्ञविलास पौडेललगायतको अभिनय छ । सोही दिन सेन्ट्रल कलेजका देशभरका दुई सय ५० बढी कर्माचारीहरुलाई सौराहामा रिफ्रेसमेन्ट पार्टी आयोजना गरेको थियो । वार्षिकोत्सव कार्यक्रमको दोस्रो दिन शनिबार वार्षिक साधारण सभा तथा गोष्टि आयोजना गरिएको थियो । उक्त कार्यक्रमसँगै कलेजको दुई दिने वार्षिकोत्सव कार्यक्रम सम्पन्न भएको प्रिन्सिपल पौडेलले बताउनुभयो ।

    लोकप्रिय

    भर्खरै