चितवन । मुग्लिनसडकखण्ड अन्तर्गत रामनगरमा चालक र यात्रुलाई लक्षित गर्दै पार्क निर्माण गरिएको छ । चितवन भएर जाने सवारी यात्रु, चालक र पैदल यात्रीको लागि बिश्राम र आराम दिने उद्देश्यले रामनगर पुष्पवाटिका निर्माण गरिएको हो । स्थानीयस्तर र केही दाताको सहयोगमा उक्त वाटीकाको हाल निर्माण कार्य तीब्ररुपमा भैरहेको छ ।
गत असारबाट निर्माण कार्य शुरु भएको उक्त पुष्पवाटिकामा हाल फलफूलको बगंैचा, चिल्ड्रेन पार्क, वाटर फाउण्टेन, विश्रामस्थललगायतको निर्माण कार्य पूरा भएको छ । “कहिले पहिरो गएर जाममा फसेका यात्रु हुन्छन्, कहिले भोकप्यासले आत्तिएका यात्रु हुन्छन् । उहांँहरुको लागि यो पार्कको परिकल्पना गरेका हौं,” वाटिकाका प्रमुख संरक्षक तारा कुँवरले भने । राजमार्गमा गुड्ने सवारी यात्रु र चालकलाई लक्षित गरी उक्त वाटीका निर्माण गरिएको प्रमुख संरक्षक तारा कुंँवरले जानकारी दिए ।
“लकडाउनको समयमा सयौं यात्रु भोकै, तिर्खै हिँडेको देख्यौं,” कुँवरले भने, “यहांँबाट काठमाडौंसम्म यस्तो प्रकारको सुविधा भएको विश्रामस्थल समेत छैन ।” भरतपुर महानगरपालिका वडा नम्बर १ अन्तर्गत पर्ने सतनचुली सामुदायिक क्षेत्रभित्र पर्ने यो वाटीका बोटानिकल गार्डेन, कलात्मक पुल एवं वाटरफाउण्टेनलगायत संरचना रहेका छन् । दुई विघा क्षेत्रफलमा रहेको उक्त वाटीकामा स्तनपान कक्ष , अपांगमैत्री शौचालय, क्यान्टिन तथा योगाभ्यास स्थल निर्माण गरिने योजना छ । सातसय फलफूल तथा जडीबुटीका विरुवा रोपेर उक्त पार्कलाई वातावरणमैत्री बनाइएको छ । “यो रिफ्रेसमेण्ट सेन्टर हो । जोकोही आएर रमाउन सक्नुहुन्छ ,” उनले भने ।
बाटीका निर्माणका लागि हालसम्म सांँढे १६ लाख रुपैयांँ र एकहजार जनाको श्रमदान खर्च भइसकेको समितिका अध्यक्ष डिलकुमारी लामिछानेले बताइन् । हालसम्म जनस्तर र दाताबाट रकम जुटाएको भन्दै उनले थप संरचना निर्माण गर्न कठिन भएको बताइन् । हाल निःशुल्क प्रवेश रहेको उक्त वाटिकामा तीनजना हेरालुले काम गर्दै आएका छन् । उक्त बाटीका नारायणगढबाट करीब ५ किलोमिटर मुग्लिनतर्फ छ । उक्त वाटिकाको औपचारिक रुपमा माघ १ गतेदेखि सञ्चालनमा आउने बताइएको छ ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.