चितवन । भरतपुर ७ नारायणपुर चोकका १० वर्षिय शिशिर कुंवर यतिबेला चितवन मेडिकल कलेज (सिएमसी) को दोस्रो तल्लाको पिआइसियु कक्षमा उपचाररत छन् । डाक्टरका अनुसार शिशिरको कलेजोमा समस्या देखीएको छ ।

आजभन्दा २–३ वर्ष अगाडीदेखी पेट दुख्ने समस्या झेल्दै आएका शिशिरका बुबा आमालाई त्यतिबेला भने पेट दुखाई ठुलोे समस्या लागेन । खानाको कमजोरी या ग्याष्ट्रिकको समस्याले होला भन्दै उनलाई पानी धेरै खुवाउन र सामान्य मेडीकलमा जाँच गराएर ग्याष्ट्रिकको औषधि खुवाएर राखियो ।
ʻकाम कुरो एकातिर कुम्लो बोकी ठिमी तिरʼ भनेजस्तै उनको पेट दुखाईको समस्या एकातिर भएकाले उनलाई सामान्य पेट दुखाईको औषधिले भेटेन ।

जाँच पछि केही समय त निको हुन्थ्यो तर भित्री पिडा अर्कै भएकाले अहिले उनी अस्पतालको बेडमा मृत्युसंग लडिरहेका छन् । कहिले चितवनकै सरकारी अस्पताल कहिले काठमाण्डौंको कान्ती बाल अस्पताल, टिचिङ अस्पताल सम्म लगातार धाउन थालेको २ महिना भन्दा धेरै भइसकेको छ । केही समय अगाडी भतरपुर सरकारी अस्पतालमा उपचार गराउँदा पत्थरीको आशंका गरी ६ महिना पछि आउनुस् भन्दै डाक्टरले पठाएपनि शिशिरको छटपटि भने कम भएन । आमाको मन न हो यत्तिकै पर्खिएर बस्न किन मान्थ्यो र । छोराको पेट दुखाइमा कमी नभएपछि शिशिरकी ३५ वर्षिया आमा सिता कुंवरले उनलाई काठमाण्डौं लगिन् । काठमाण्डौंको कान्ती बाल अस्पताल लैजाने सुझाव भने भरतपुर अस्पतालले नै दिएको थियो ।

मजदुरी गरी जिविकोपार्जन गर्दै आएका शिशिरको आमासंग छोरालाई बोकेर काठमाण्डौं जाँदै गर्दा साथमा १० हजार रुपैंया भन्दा थिएन । त्यहाँ गएर लामो समय उपचार त के रगत, दिसा , पिसाब जाँच गराउंदैमा लगेको पैसा सकियो । त्यहाँबाट उनीहरु फोक्सोमा पानी सुकेको र पानीको मात्रा बढाउन सकेमा निको हुन सक्ने आश्वासनको साथमा फर्किए ।

तर फेरी केही दिनमै शिशिरको शरिर भित्रको व्यथा बल्झीयो । त्यसपछि असारको पहिलो सातादेखी चितवन मेडिकल कलेजको पिआइसियुमा शिशिरको उपचार भैरहेको छ । अस्पतालले उपचारका लागि करिब १५–२० लाख रुपैंया लाग्ने बताएको छ । शिशिरलाई बचाउनको लागि उनको शरिरमा कलेजो प्रत्यारोपण गर्नुपर्ने हुन्छ । १५–२० लाख त्यसैको लागि जोहो गर्नुपर्ने रकम हो । यसका अलवा प्रत्यारोपण गर्दा हुने अप्रेसनको खर्च १० भने अस्पतालले व्यहोर्ने बताइएको छ ।

यतिबेला शिशिरको आमा बुबासंग उनको उपचारका लागि लाग्ने खर्च जुटाउन त के दैनिक आवश्यकका औषधि किन्न पनि पैसा छैन । अहिलेसम्म केही मानिसहरुले व्यक्तिगत रुपमा गरेको केही आर्थिक सहयोगले नै जेनतेन खर्च चलिरहेको छ । तर जतिसक्दो छिटो पैसा जुटाएर कलेजो प्रत्यारोपण गर्नुपर्ने डाक्टरहरु बताउंछन् । ७–८ वर्षको उमेर सम्म निकै तन्दुरुस्त देखीने शिशिर अहिलेकहिले निको भएर घर जान पाउँला भन्दै अस्पतालको बेडमा सहयोगी हातको पखाईमा छन् ।

असार ५ गते बिहान सम्म खाजा, खाना खांदै हाँस्दै खेल्दै गरेका शिशिरले त्यसदिन एक्कासी पेट दुखे पछि त्यसयता सलाइन पानीको भरमा दिन कटाइरहेका छन् । खाना पचाउने पाचन प्रणाली कमजोर हुंदा उनले पानी र कहिलेकाँही निल्न सक्ने जुसको भरमा बाँच्नु परेको हो । यहि असारको २६ गते ११ वर्ष पुग्दै गरेका बिरामी शिशिरको धेरै सपनाहरु छन् ।

उनी बोल्न सक्ने भएका बेला आफ्नी आमालाई आफु बाँचेर धेरै काम गर्ने भन्दै आश्वासन समेत दिन्छन् । बाँच्न मात्रै पाए ठुलो भएर धेरै पैसा कमाउने, २ तलाको घर बनाउने अनि आमालाई सुखसंग पाल्ने सपना छ । ʻमलाई केही भएको छैन, यत्ति पेट दुखेको मात्रै त होनी, निको भैहाल्छ नि आमाʼ भन्छ छोराले भन्दै सीता कुंवर रुंदै शिशिरको सपना सुनाउंछिन् । निको भएपछि कि त पुलिस कि त ड्राइभर बन्ने शिशिरको लक्ष्य छ । जहाँ गाह्रो त्यहाँ झन साह्रो भनेजस्तै भएको छ कुंवर परिवारलाई । आफ्नो छोराको उपचारमा मनकारी मनहरुले सहयोग गरेर जीवन रक्षा गरिदिनका लागि उनले आग्रह गरेकी छन् ।

बिहीबारदेखि देशका विभिन्न क्षेत्रमा वर्षा हुने

विदेशी फूलको आयात रोक्न किसानको माग

चितवनमा रहेको धान ‘जोन’मा उत्पादन बढ्यो