मकवानपुर । राक्सिराङ गाउँपालिका वडा नं. ५ मा स्थित लोकप्रिय प्राथमिक विद्यालय जुर्लिङमा अध्ययनरत विद्यार्थीका लागि पोशाक तथा सरसफाइ स्वच्छताका सामग्री सहयोग गरिएको छ । अमेरिकाको जर्जियामा बसोबास गर्दै आएका दम्पती कर्ण गुरुङ, प्रेमा गुरुङ र उनीहरुको छोराद्वय सलिन र समिन गुरुङको तर्फबाट बिहीबार उक्त सहयोग उपलब्ध भएको समाजसेवी रेखा तामाङ लोप्चनले  जानकारी दिए ।

गाउँपालिकाको विकट भेगका चेपाङ विद्यार्थीलाई समाजसेवी तामाङकै सहयोगको अभियानअन्तर्गत गुरुङ परिवारले सो सहयोग गरेका हुन् । गुरुङ परिवारले यसअघि (असार) पनि सोही स्थानमा विद्यालय पोशाक र सरसफाइका लागि भन्दै आर्थिक सहयोग उपलब्ध गराएको थियो । त्यसबेला कर्ण गुरुङ आफैँ आएर विद्यालय र बालबालिकाको अवस्थाबारे बुझेपछि थप सहयोग गरिएको समाजसेवी तामाङले बताइन् । पहिलो चरणमा छुटेकामध्ये ७५ जनाभन्दा बढी बालबालिकालाई पोशाक तथा सरसफाइ सामग्री वितरण गरिएको उनले भने ।

चेपाङ बालबालिकालाई टिफिन बक्स, पानी खाने बोत्तल, स्याम्पु साबुन, ब्रस, मन्जन लगायत विभिन्न सामग्री दिइएको थियो । सोही अवसरमा गुरुङ परिवारले चेपाङ समुदायको दुई जना बालबालिकालाई स्कुले शिक्षा पूरा भएपछि डाक्टर पढाउन सहयोग गर्नेसमेत घोषणा गरेको समाजसेवी तामाङले जानकारी दिइन् । कार्यक्रममा संविधान सभा सदस्य राजाराम स्याङतान प्रमुख अतिथि रहेका थिए । कार्यक्रमको उद्घाटनको क्रममा बोल्दै प्रमुख अतिथि स्याङतानले विकटका विपन्न चेपाङ बालबालिकाको उज्वल भविष्यको लागि सबै एकजुट भएर लाग्नुपर्ने बताए ।

उनले सहयोग गर्ने दाताको खुलेर प्रशंसा गरेका थिए । संविधान सभा सदस्य स्याङतानले सम्मान स्वरुप मायाको चिनो समाजसेवी रेखा तामाङ मार्फत सहयोगी दाता (गुरुङ दम्पत्ती) लाई हस्तान्तरण गरेका थिए । कार्यक्रममा स्थानीय अगुवा कृष्णबहादुर चेपाङ, सगुन स्याङतान, ज्ञानेन्द्र तामाङ, रामशरण प्रजा लगायतको उपस्थिति रहेको थियो ।

करिब ८० जना विद्यार्थी रहेको सो विद्यालयमा अधिकांश चेपाङ बालबालिका अध्ययनरत छन् । राक्सिराङका विकट भेगमा विपन्न तथा गरिब परिवारको बालबालिकालाई विद्यालय पोशाक तथा स्टेशनरी सामग्रीहरुको सधैं अभाव हुने गरेको छ ।

बागमती प्रदेशले संघिय सरकारसँग पुनर्निर्माणका लागि एक अर्ब अनुदान माग्ने

कारले स्कटिङ् गर्दै ल्याएको एक सय ६२ किलो गाँजासहित दुई जना पक्राउ

सीएमसीद्वारा कैलाशमा निःशुल्क स्वास्थ्य शिविर, ३८३ जनाले लिए सेवा