☰

भर्खरै

लोकप्रिय समाचार

चितवन उद्योग संघद्वारा ५१ वटा अक्सिजन ग्यांँस सिलिण्डर हस्तान्तरण

  •   सोमबार, बैशाख २७, २०७८ मा प्रकाशित
    • अ
    • अ
    • अ

    चितवन । चितवन उद्योग संघले अक्सिजन ग्याँस सिलिण्डर हस्तान्तरण गरेको छ । संघले आईतबार भरतपुर महानगरपालिका वडा नम्बर १ स्थित अक्सिजन ग्यांँस उत्पादक कम्पनी ॐ सञ्जीवनी इन्टरप्राइजेजलाई ५१ वटा अक्सिजन ग्याँस सिलिण्डर हस्तान्तरण गरेको हो । जिल्लाका विभिन्न उद्योगहरुमा मौज्दातमा रहेका सिलिण्डर जम्मा गर्न आग्रह गरेसंँगै संघका अध्यक्ष राजु पौडेल र इन्टरप्राइजेजका सञ्चालक निरञ्जन न्यौपानेलाई सम्झौता गरी सिलिण्डर हस्तान्तरण गरिएको हो ।

    सिलिण्डरहरु जिल्ला प्रशासन कार्यालय चितवनको सिफारिसका आधारमा आवश्यकता र माग बमोजिम चितवनका स्थानीयपालिका र स्वास्थ्य संस्थाहरुलाई उपलब्ध गराईने र सहज परिस्थितिमा सम्बन्धित ग्यांँस धनीलाई फिर्ता गर्नेगरी संघका अध्यक्ष पौडेलको अध्यक्षतामा जिल्ला समन्वय समितिका प्रमुख कृष्णकुमार डल्लाकोटीको प्रमुख आतिथ्यतामा हस्तान्तरण गरिएको थियो । सो क्रममा बोल्दै अध्यक्ष राजु पौडेलले संघले सिलिण्डर जम्मा गर्ने अभियान अन्तर्गत उद्योगीका १६ वटा सिलिण्डर यसअघिनै जिल्लाका अन्य ग्यांँस कम्पनीलाई उपलब्ध गरिएको जानकारी दिए ।

    ‘संस्थागत सामाजिक उत्तरदायित्व अन्तर्गत हामीले आर्थिक सहयोगका साथै अहिलेको परिस्थितिमा मानवीय संवेदनशीलतालाई मध्यनजर गर्दै हामीले हातेमालो गरेका हौं ।’ अध्यक्ष पौडेलले भने । देशभर अक्सिजन अभावको चरम अवस्था सिर्जना भएको बेला सकारात्मक सन्देश जाओस भन्ने हेतुले संघले सक्दो सहयोग गर्न लागेको उनले बताए । हस्तान्तरण कार्यक्रममा बोल्दै जिल्ला समन्वय समितिका प्रमुख डल्लाकोटीले देशको यो जटिल, जोखिम परिस्थितिमा जनप्रतिनिधिहरु पनि चिन्तित रहेको भन्दै नीजि क्षेत्रले गरेको सामाजिक विकास तथा उत्तरदायित्व बहन गरेको सह्रानीय कदमको प्रशंसा गरे ।

    आगामी दिनमा जोखिम न्यूनिकरणमा आफूहरु लाग्ने भन्दै कार्यालयका सवारीसाधन विरामीको सेवामा प्रयोग गरिने बताए । बोटलर्स नेपाल (तराई) लिमिटेडबाट ४० वटा, स्याण्डविच होम सोलुसनबाट २ वटा, हाईटेक डेलभलपर्सबाट ५ वटा, होमटेक प्रा.लि.बाट ३ वटा र त्रिदेव इन्जिनियरिङबाट १ वटा गरी कुल ५१ वटा ग्याँस सिलिण्डरहरु संकलन गरिएको हो । यसैगरी १६ वटा ग्याँस सिलिण्डरहरु उद्योगहरुले सम्बन्धित ग्याँस उद्योगलाई फिर्ता गरिसकेका छन् ।

    जसमध्ये जलप नेपाल प्रा.लि.बाट १० वटा, सेफ स्टिल प्रा.लि.बाट ५ वटा, ए.आई.बिल्लिङ मेटेरियल प्रा.लि.बाट १ वटा, बाबा कृषि औजार उद्योगबाट ३ वटा र बिनय स्टिल ई.प्रा.लि.बाट ३ वटा सम्बन्धित उद्योगहरुलाई फिर्ता गरिएको थियो। अक्सिजन ग्याँस सिलिण्डर हस्तान्तरण कार्यक्रममा चितवन उद्योग संघका निवर्तमान अध्यक्ष भेषराज दुवाडी, नेपाल पत्रकार महासंघ चितवनका अध्यक्ष नारायण प्रसाद अधिकारी, कार्यसमिति सदस्य मदन चिरञ्जीवी पोखरेल, विभिन्न सञ्चार क्षेत्रका प्रतिनिधिहरुको उपस्थिति रहेको थियो।

    चितवन उद्योग संघका कार्यकारी निर्देशक गणेशप्रसाद सिलवालले सञ्चालन गरेका अक्सिजन ग्याँस सिलिण्डर हस्तान्तरण कार्यक्रमलाई संघका उपाध्यक्ष सूर्यप्रसाद न्यौपानेले धन्यवाद मन्तव्य सहित समापन गरेका थिए।

    लोकप्रिय

    भर्खरै